Սէյիտ Նասրալլա. «Երբ Յուսախաբ Դառնանք Լիբանանեան Պետութեան Ցուցաբերած Թերացումներէն` Վառելանիւթը Իրանէն Պիտի Գնենք»

0
315

Հըզպալլայի ընդհանուր քարտուղար սէյիտ Հասան Նասրալլա երէկ երեկոյեան ժամը 5:30-ին արտասանեց պատկերասփռուած ճառ մը` «Մանար» պատկերասփիւռի կայանի հիմնադրութեան 30-ամեակին առիթով:

Ան բարձր գնահատեց «Մանար»-ի առաքելութիւնն ու 30-ամեայ դերակատարութիւնը:

Սէյիտ Նասրալլա շնորհակալութիւն յայտնեց բոլոր անոնց, որոնք իր առողջութեամբ մտահոգ էին` հաստատելով, որ իր առողջութիւնը լաւ է եւ կը գնահատէ հարցնողներուն արտայայտած սէրը իր հանդէպ:

«Առողջական վիճակս լաւ է եւ տակաւին կ՛երազեմ ու մեծ յոյսեր ունիմ Աքսայի մզկիթին մէջ աղօթելու», հաստատեց ան:

Անդրադառնալով ներքին լիբանանեան իրադարձութիւններուն` սէյիտ Նասրալլա յայտնեց, որ իրենք բնաւ չեն մտածած երեսփոխանական ընտրութիւնները յետաձգելու մասին եւ այդ իմաստով ոչ մէկ դաշնակիցի հետ քննարկում կատարած են:

«Միւս կողմէ, տակաւին կը մերժենք կանխահաս երեսփոխանական ընտրութիւններու կայացումը եւ ատիկա ժամանակի կորուստ կը նկատենք», ըսաւ սէյիտ Նասրալլա:

Իր խօսքը ուղղելով կանխահաս երեսփոխանական ընտրութիւններ պահանջող քաղաքական ուժերուն` սէյիտ Նասրալլա ըսաւ, որ այդ մասին խօսելու փոխարէն անոնք կրնան կառավարութիւն կազմել:

Կառավարութեան կազմութեան հոլովոյթը աշխուժացնելու շրջագիծին մէջ խորհրդարանի նախագահ Նեպիհ Պըրրիի նախաձեռնութեան անդրադառնալով` սէյիտ Նասրալլա շեշտեց, որ իրենք նեցուկ կը կանգնին Պըրրիին եւ կը հաստատեն, որ առանց յուսալքուելու պէտք է աշխատանքը շարունակել:

«Պետական առումով իւրաքանչիւր թղթածրարի պարագային շօշափելի է պետութեան թուլութիւնը, ինչ որ կը բազմապատկէ քաղաքացիներուն տառապանքը: Հետեւաբար կառավարութիւնը պէտք է ստանձնէ իր պատասխանատուութիւնը», ըսաւ ան:

Սէյիտ Նասրալլա ընդվզումով անդրադարձաւ չարաշահողներուն` շեշտելով, որ անոնք ծանօթ են բոլորին եւ ազատ ու անկախ կը թափառին` քաղաքական ծածկոյթով:

Վառելանիւթի տագնապին մասին սէյիտ Նասրալլա հաստատեց, որ խիստ մերժելի է քաղաքացիական ինքնաշարժներուն հերթերը նշմարել ճամբաներուն վրայ, եւ աւելցուց, որ եթէ իրենք յուսախաբ դառնան պետութեան ցուցաբերած թերացումներէն, ապա վառելանիւթը Իրանէն պիտի գնեն:

«Երբ պետութեան անպատասխանատու վարուելակերպէն յուսահատինք, ապա Իրանէն պիտի գնենք վառելանիւթը, որ իրանեան նաւերով պիտի հասնի Պէյրութի նաւահանգիստ եւ տրամադրուի լիբանանցիներուն: Իսկ պետութիւնը եթէ կրնայ թող արգիլէ մեզի», ըսաւ ան:

Պաղեստինեան իրավիճակին մասին սէյիտ Նասրալլա յայտնեց, որ Պաղեստինի, յատկապէս Երուսաղէմի եւ Աքսայի մզկիթին մօտակայքը պատահածները խիստ մերժելի են:

Ան ընդգծեց, որ Երուսաղէմն ու Աքսայի մզկիթը ամբողջ արաբ ազգին պատասխանատուութիւնը կը նկատուի:

«Պէտք է վկայել նաեւ, որ պաղեստինցիները իրենց կարգին Երուսաղէմի բնակիչներն են. անոնք իրենց ներկայութեամբ, համբերութեամբ, գոյապայքարով եւ մարմիններով պաշտպանած են Աքսայի մզկիթը, հետեւաբար Երուսաղէմի վրայ յարձակումը շրջանային պատերազմ կը նշանակէ», ըսաւ ան` զգուշացնելով, որ Իսրայէլի նախկին վարչապետ Պենիամին Նեթանիահու կրնայ դարձեալ անխոհեմ քայլի դիմել` նկատի ունենալով իր դիմագրաւած քաղաքական վերջին տագնապը:

LEAVE A REPLY

Please enter your comment!
Please enter your name here