Չաւուշօղլու. «Հայաստանի Նոր Ղեկավարութիւնը Պէտք Է Դասեր Քաղէ Անցեալէն»

0
254

Թուրքիան յոյս ունի, որ Հայաստանի նոր ղեկավարութիւնը դասեր պիտի քաղէ անցեալէն: «ՌԻԱ Նովոսթի» լրատու գործակալութիւնը կը հաղորդէ, որ այս մասին յայտնած է Թուրքիոյ արտաքին գործոց նախարար Մեւլութ Չաւուշօղլու` մեկնաբանելով Հայաստանի մէջ ընթացող խորհրդարանական արտահերթ ընտրութիւնները:

«Մենք Հայաստանի մէջ ընտրութիւնները կը նկատենք այդ երկրի ներքին գործը: Հայաստանի նոր ղեկավարութիւնը պէտք է դասեր քաղէ անցեալէն», ըսած է Չաւուշօղլու` խօսք արտասանելով Անթալիոյ մէջ տեղի ունեցած դիւանագիտական խորհրդաժողովին, որ սփռուած է անոր «Թուիթըր»-ի էջին վրայ:

«Անատոլու» լրատու գործակալութիւնը հաղորդեց, որ Չաւուշօղլու խորհրդաժողովի ընթացքին անդրադարձած է այն պետութիւններուն, որոնց հետ Անգարան խնդիրներ ունի:

«Միջերկրական ծովը պէտք է բարեկամութեան ծովու վերածուի: Ատոր համար անհրաժեշտ են նոր մօտեցումներ», ըսած է Չաւուշօղլու` ընդգծելով, որ Յունաստանը պէտք է հրաժարի սադրիչ քայլերէ:

«Եւրոպական Միութիւնը պէտք է վերջապէս վերադառնայ բանակցութիւններու սեղան եւ ձեռնարկէ շօշափելի քայլերու: Անգարան հաւատարիմ է յարաբերութիւններու զարգացման: Յունաստանը պէտք է հրաժարի սադրիչ գործողութիւններէն: Իսկ Հայաստանը, իր դրացիներու տարածքին նկատմամբ ոտնձգութիւն կատարելու փոխարէն, պէտք է բնական յարաբերութիւններ հաստատէ անոնց հետ», ըսած է Չաւուշօղլու:

 

LEAVE A REPLY

Please enter your comment!
Please enter your name here