Պէյրութի Մէջ. «Առանց Բարեկարգումի Գործադրութեան Կարելի Չէ Լիբանանին Օժանդակութիւններ Տրամադրել» Շեշտեց Ժոզեֆ Պորել

0
232

Եւրոպական Միութեան արտաքին քաղաքականութեան բարձրագոյն յանձնակատար Ժոզեֆ Պորել շաբաթավերջին պաշտօնական այցելութեամբ մը հասաւ Լիբանան, ուր հանդիպումներ ունեցաւ իշխանութեան պետերուն եւ քաղաքական անձնաւորութիւններու հետ:

Հանրապետութեան նախագահ զօր. Միշել Աուն նախագահական պալատին մէջ ընդունեց Պորելը, որուն հետ քննարկեց Լիբանանը յուզող դժուար ու տագնապալի պայմաններն ու երկիրը այդ իրավիճակէն դուրս բերելու համար Եւրոպական Միութեան ունենալիք դերակատարութեան վերաբերող հարցեր:

Հանդիպումին ընթացքին նախագահ Աուն յայտնեց, որ բարեկարգումը այն հիմնական պայքարն է, որ պիտի մղուի նոր կառավարութեան կողմէ, երբ այդ կառավարութեան կազմութիւնը արգելակող ներքին եւ արտաքին խոչընդոտները վերանան:

Նախագահ Աուն շեշտեց, որ Լիբանանի մէջ տիրող իրավիճակը իւրայատուկ է եւ անիկա իրապաշտ, սահմանադրութեան ու լիբանանեան ուխտին համաձայն մօտեցում կ՛ենթադրէ` երկրին գործադիր իշխանութիւնը կազմելու առումով:

Նախագահ Աուն շնորհակալութիւն յայտնեց Պորելին` Եւրոպական Միութեան կողմէ Լիբանանին մատուցուած օժանդակութիւններուն եւ յատկացումներուն համար, յատկապէս Պէյրութի նաւահանգիստի պայթումէն ետք, սուրիացի տեղահանուածներու թղթածրարին առումով, լիբանանեան տնտեսական տագնապը դիմագրաւելու, ինչպէս նաեւ «Քորոնա» համաճարակին դէմ պայքարելու առումով:

Նախագահ Աուն Պորելէն պահանջեց շարունակել Լիբանանին տրամադրուող օժանդակութիւնները` ընդգծելով, որ Եւրոպան պէտք է օժանդակէ Լիբանանին, որպէսզի ան կարենայ վերադարձնել պետական գանձարկղէն իւրացուած եւ եւրոպական դրամատուներ փոխանցուած գումարները:

Նախագահ Աուն ընդգծեց նաեւ իրաւական հաշուեքննութեան կարեւորութիւնը` հակառակ փտածութեան դէմ պայքարի նպատակով տարուող քաղաքական աշխատանքի արգելակումին:

«Իրաւական հաշուեքննութիւնը առաջին քայլն է, որ պէտք է առնուի փրկութեան նախաձեռնութիւններու շրջագիծին մէջ, իսկ այդ ծրագիրէն բացի կարելի չէ բարեկարգումներ գործադրել եւ Լիբանանի նկատմամբ արտաքին աշխարհին վստահութիւնը վերահաստատել», ըսաւ նախագահ Աուն:

Հանրապետութեան նախագահը ընդգծեց, որ Լիբանան կ՛ողջունէ Եւրոպական Միութեան կողմէ տրամադրուող որեւէ օժանդակութիւն, որ կը միտի արագացնել երկրին նոր կառավարութեան կազմութեան հոլովոյթը:

Նախագահ Աուն շեշտեց, որ Լիբանանի կողմէ միջազգային ընտանիքէն ակնկալուած օժանդակութիւնը միայն մարդասիրական ոլորտին չի վերաբերիր, այլ` բարգաւաճման: Ան աւելցուց նաեւ, որ Լիբանան ի վիճակի չէ սուրիացի տեղահանուածներուն իրավիճակը հանդուրժելու:

Իր կարգին, Պորել ընդգծեց Լիբանանի նոր կառավարութեան կազմութեան կարեւորութիւնը:

Ան շեշտեց, որ Լիբանանի դիմագրաւած տագնապը տեղական է ու ներքին` աւելցնելով, որ լիբանանցիներուն վրայ այդ տագնապին ունեցած հետեւանքները հսկայ են:

«Լիբանանցի պատասխանատուները պէտք է պատասխանատուութիւն ստանձնեն եւ կառավարութիւն կազմեն, ինչպէս նաեւ անմիջապէս անցնին հիմնական բարեկարգումներու գործադրութեան: Առանց բարեկարգումի գործադրութեան կարելի չէ Լիբանանին օժանդակութիւններ տրամադրել, իսկ մենք օժանդակութեան յատուկ աղբիւրներ ունինք», հաստատեց Պորել:

Ան կարեւոր նկատեց, որ երեսփոխանական ընտրութիւնները կայանան սահմանադրութեամբ ճշդուած թուականին` աւելցնելով, որ Եւրոպական Միութիւնը Լիբանանի երեսփոխանական ընտրութիւններուն հսկող միջազգային դէտեր պիտի ուղարկէ: «Մեզի համար կարեւոր է, որ Լիբանանի երեսփոխանական ընտրութիւնները կատարուին յարգելով ժողովրդավարական սկզբունքները», ըսաւ ան:

Պորել այցելեց նաեւ խորհրդարանի նախագահ Նեպիհ Պըրրիի, որուն հետ քննարկեց լիբանանեան իրադարձութիւնները եւ կառավարութեան կազմութեան դիմագրաւած տագնապին բոլոր մանրամասնութիւնները:

Պըրրի Պորելին ներկայացուց կառավարութեան կազմութեան իմաստով իր առաջադրած նախաձեռնութիւնը եւ ներկայիս անոր կազմութեան դիմագրաւած արգելակումը:

Հանդիպումին ընթացքին քննարկուեցան նաեւ խորհրդարանին կողմէ վաւերացուած բարեկարգումի յատուկ օրէնքները:

Հանդիպումը եղաւ առիթ մը, որուն ընթացքին Պըրրի շնորհակալութիւն յայտնեց Եւրոպական Միութեան դերակատարութեան եւ անդրադարձաւ ֆրանսական նախաձեռնութեան կարեւորութեան` Լիբանանը իր դիմագրաւած տագնապէն դուրս բերելու իմաստով:

Վարչապետարանին մէջ Պորել ընդունուեցաւ վարչապետի պաշտօնակատար Հասսան Տիապի կողմէ:

Հանդիպումին ընթացքին Լիբանանի դիմագրաւած ընկերային-տնտեսական եւ ելեւմտական տագնապը արծարծելու լոյսին տակ` Տիապ յայտնեց, որ այդ տագնապին լուծման բանալին կարելի է ապահովել նոր կառավարութեան կազմութեամբ եւ Միջազգային դրամական ֆոնտին հետ բանակցութիւններուն վերսկսումով:

Տիապ դրուատեց Լիբանանի եւ Եւրոպական Միութեան միջեւ փոխադարձ գործակցութիւնն ու երկկողմանի յարաբերութիւնները:

Պորել հաստատեց Եւրոպական Միութեան պատրաստակամութիւնը` օժանդակելու Լիբանանին եւ լիբանանցիներուն, որպէսզի անոնք դիմագրաւեն երկիրը յուզող դժուար պայմանները:

Պորել, ընկերակցութեամբ Լիբանանի մէջ Եւրոպական Միութեան դեսպան Ռալֆ Թրաֆի, այցելեց նշանակեալ վարչապետ Սաատ Հարիրիի:

Հանդիպումին ընթացքին քննարկուեցան երկրին քաղաքական իրադարձութիւններն ու Լիբանանի եւ Եւրոպական Միութեան միջեւ յարաբերութիւնները:

Պորել այցելեց նաեւ փոխվարչապետ եւ պաշտպանութեան նախարարի պաշտօնակատար, ինչպէս նաեւ արտաքին գործոց եւ արտերկրի լիբանանցիներու հարցերու նախարարի գործակատար Զէյնա Աքըրի, որուն հետ քննարկեց լիբանանեան իրադարձութիւնները, Լիբանանի մէջ սուրիացի տեղահանուածներուն ստեղծած տագնապն ու լիբանանեան բանակի օժանդակութեան համար Ֆրանսայի հրաւիրած առցանց խորհրդաժողովին արդիւնքները:

Աքըր Պորելին ներկայացուց Լիբանանի դիմագրաւած տնտեսական, ընկերային եւ ապրուստի ահաւոր իրավիճակը, եւ դրուատեց Եւրոպական Միութեան դերակատարութիւնը եւ անոր տրամադրած օժանդակութիւնները, յատկապէս անոնք, որոնք Լիբանան հասած էին` Պէյրութի նաւահանգիստի պայթումէն ետք:

Աքըր ընդգծեց, որ ամէն իմաստով եւ միջոցներով պէտք է օժանդակել Լիբանանին, որպէսզի ան դուրս գայ իր դիմագրաւած տագնապներէն:

Եարզէի մէջ լիբանանեան բանակի հրամանատար զօր. Ժոզեֆ Աուն ընդունեց Պորելը, որուն հետ քննարկեց լիբանանեան եւ շրջանային իրադարձութիւնները:

Պէյրութէն մեկնումի պահուն Պորել լրագրողներուն հետ ունեցած իր զրոյցին ընթացքին շեշտեց, որ Լիբանանի դիմագրաւած տագնապին պատճառը լիբանանցի պատասխանատուներուն միջեւ իշխանութեան բաժնեկցութեան պայքարն է` հաստատելով, որ առանց նոր կառավարութեան կազմութեան Եւրոպական Միութիւնը Լիբանանին օժանդակութիւններ պիտի չտրամադրէ:

Պորել ընդգծեց, որ կարգ մը լիբանանցի պատասխանատուներ կրնան պատժամիջոցներու ենթարկուիլ, եթէ շարունակեն նոր կառավարութեան կազմութեան ճիգերը եւ անոր գործադրելիք հաւանական բարեկարգումները արգելակել:

«Երկիրը կը դիմագրաւէ տնտեսական ու ելեւմտական լուրջ հարցեր եւ այդ պատճառով ալ լիբանանցիները կարիքը ունին նոր կառավարութեան, որպէսզի լուծէ տնտեսական այդ տագնապը եւ ընկղմելէ փրկէ լիբանանցիները փոխադրող լաստը», ըսաւ ան:

Պորել շեշտեց, որ Լիբանանի մէջ կայ անվստահութիւն` աւելցնելով, որ Լիբանան կարիքը ունի կառավարութեան մը, որ թեքնիք կարողութիւններ ունի, ինչպէս նաեւ իսկական իշխանութիւն` Հասսան Տիապի կառավարութեան ձախողութիւնները վերացնելու եւ ելեւմտական համակարգի առողջ բարեկարգում իրականացնելու համար:

«Արտաքին օժանդակութիւնները Լիբանան պիտի չհասնին, եթէ չըլլայ կառավարութիւն մը, որ կը բանակցի Միջազգային դրամական ֆոնտին հետ եւ կը պայքարի փտածութեան դէմ` գործադրելով բարեկարգումներ», ըսաւ ան:

LEAVE A REPLY

Please enter your comment!
Please enter your name here