24 Դեկետմբեր 2021
Մեծայարգ
Տէր եւ Տիկին Դոկտք. Հրայր եւ Արտա Ճէպէճեան
Նիկոսիա – Կիպրոս
Սիրելիք,
Ուրախութեամբ իմացանք, որ Կիրակի, 19 Դեկտեմբեր 2021-ին Մեծի Տանն Կիլիկիոյ Կաթողիկոսութեան վեհարանի դահլիճէն ներս, Ն.Ս.Օ.Տ.Տ. Արամ Ա. Վեհափառ Հայրապետը հանդիսաւորապէս Ձեզ պարգեւատրած է Մեծի Տանն | Կիլիկիոյ Կաթողիկոսութեան Ս. Մեսրոպ Մաշտոցի պատուոյ շքանշանով:
Արժան եւ իրաւ։
Բնական եւ ակնկալելի երեւոյթ էր, որ մշակույթն ու մտաւորական վաստակը բարձրօրէն գնահատող Վեհափառ Հայրապետին ուշադրութենէն չվրիպի Աստուծոյ խօսքին ու պատգամին մատակարար, ու նաեւ մեր աշխարհասփիւռ հայութեան առօրեայ պատկերներն ու ծալքերը հրապարագրութեամբ տեսանելի դարձնող՝ Դոկտ. Հրայր Ճէպէճեանի վաստակը գնահատել եւ անձը պարգեւատրել մեր մշակույթի հայր՝ Ս. Մերոպ Մաշտոցի շքանշանով։
Ձեր անձին ու վաստակին ընդմէջէն յստակօրէն տեսանելի է, աւետարանական ընտանիքի դաստիարակութիւնը եւ վարժարանի կրթութիւնը։ Անոր համար ալ, թէ Աստուածաշունչի Ընկերութեան մէջ շրջանային տնօրէնի բարձր պատասխանատուութիւնը սոսկ գործ չեղաւ, եւ ոչ ալ հրապարագրութեամբ մտաւորական վաստակը պատահականութեան արդիւնք: Անոնց մէջ յստակօրէն կ’երեւին նուիրումը:
Նոյնքան յստակօրէն տեսանելի եւ զգալի է, Ձեր սիրասուն Տիկնոջ`Դոկտ. Արտային Ձեր ետին ու կողքին ըլլալու իրականութիւնը, անկեղծ սիրոյ եւ աննուազ նուիրումի գեղեցիկ արտայայտութիւն:
Պարգեւատրուող Ձեր անձին մէջ տեսնելով մարդկային ընկերութեան բարելաւումն ու յառաջդիմութիւնը՝ Մարդուն հոգեւոր, բարոյական, համամարդկային ու նաեւ մեր պարագային ազգային արժէհամակարգով օժտելու համոզումին տագնապը ապրողը, վստահ ենք, որ նոյն թափով եւ կորովով պիտի շարունակէք Ձեր առաքելութիւնը:
Ձեզի կը մաղթենք քաջառողջութիւն եւ Աստուծոյ հովանիին ներքեւ յարատեւ յաջողութիւն:
Այս պատեհ առիթով, գոհունակ սրտի պարտք կը զգանք մեր խորին շնորհակալութիւնները յայտնելու Ձերդ սիրելիութեան, աբեղայական մեր ձեռնադրութեան քառասնամեակին առթիւ, Ձեր ուղղարկած շնորհաւորական գրութեան մէջ արտայայտած գնահատական գեղեցիկ խօսքերուն եւ սրտագին բարեմաղթութիւններուն համար:
Ամանորի եւ Ս.Ծննդեան կենսուրախ եւ սուրբ տօներուն առթիւ, ընդունեցէք մեր սրտագին բարեմաղթութիւնները յառաջիկայ տարուան համար:
Շնորհաւոր Նոր Տարի եւ Սուրբ Ծնունդ:
Աղօթակից՝
ԳԵՂԱՄ ԱՐՔ. ԽԱՉԵՐԵԱՆ
ԱՌԱՋՆՈՐԴ ՅՈՒՆԱՍՏԱՆԻ ԹԵՄԻՆ