Իրանի արտաքին գործոց նախարարութեան բանբեր Սայիտ Խաթիպզատէ յայտարարեց. «Միջազգային տէրութիւններու հետ հիւլէական ծրագիրին շուրջ բանակցութիւնները 2015-ի համաձայնութեան վերակենդանացման ուղղութեամբ մեծ յառաջդիմութիւն արձանագրեցին»: Ան նաեւ յայտնեց, որ «պատժամիջոցներու ջնջումը կարեւոր հարց է, եւ սկիզբէն ի վեր կը հետապնդենք զայն բանակցութիւններուն, որոնց մէջ վերջերս յստակ յառաջդիմութիւն արձանագրուեցաւ»:
«Մենք կը պահանջենք ջնջել տնտեսական պատժամիջոցները, որոնք կը հակասեն համաձայնութեան, եւ ատկէ զիջում չկայ», ըսաւ Խաթիպզատէ` աւելցնելով. «Իսրայէլ կը ջանայ անհիմն պնդումներով խոչընդոտել Վիեննայի մէջ բանակցութիւնները»:
«Ուաշինկթընի` մեզի հետ ուղղակի բանակցութիւններ վարելու պահանջը քաղաքական նպատակներ իրագործելու համար ցուցադրական քայլ է», ըսաւ ան:
Խաթիպզատէ նաեւ յայտարարեց, որ «Վիեննայի մէջ որեւէ բանի շուրջ համաձայնութիւն պիտի չըլլայ, նախքան ամէն բանի շուրջ համաձայնութիւն գոյացնելը»` շեշտելով. «Կը սպասենք, որ Ուաշինկթընն ու եւրոպական եռեակը Վիեննայի մէջ որոշումներ տան, եւ մինչեւ օրս այդ առնչութեամբ կամք չտեսանք»:
Նշենք, որ Իրանի արտաքին գործոց նախարար Հիւսէյն Ամիր Ապտոլլահեան նախապէս «Սի.Էն.Էն.»-ին յայտնած էր. «Մենք Վիեննայի բանակցութիւններու արդիւնքներուն վերաբերեալ շատ լաւատես ենք»:
«Իրանեան նոր վարչակազմին մօտ հակառակ կողմին հետ լաւ գործարք մը գոյացնելու լուրջ կամք գոյութիւն ունի», նշած էր ան:
«Երբեք Վիեննայի բանակցութիւններուն մէջ գործարք գոյացնելուն այսքան մօտ չենք եղած», յայտարարեց ան` շեշտելով. «Եթէ կարգ մը հարցեր լուծուին, կրնանք քանի մը ժամէն կամ քանի մը օրէն համաձայնութեան հասնիլ»:
Իրանի արտաքին գործոց նախարարութեան բանբեր Սայիտ Խաթիպզատէ յայտնեց. «Թեհրան պատրաստ է Սէուտական Արաբիոյ հետ բանակցելու»:
Նշենք, որ Ռուսիոյ նախագահի Միջին Արեւելքի հարցերով յատուկ բանագնաց Միխայիլ Պոկտանով երէկ «Վալտայ» ակումբին կազմակերպած խորհրդաժողովին ընթացքին յայտարարեց, որ իր երկիրը պատրաստ է Իրանի եւ Սէուտական Արաբիոյ միջեւ միջնորդութիւն կատարելու: