ԵՐԵՒԱՆ, «Արմէնփրէս».- Արցախի նախագահ Արայիկ Յարութիւնեանի դէմ Ատրպէյճանի յայտարարած հետապնդումներէն ետք, Պաքու այս անգամ թիրախ ընտրեց Հայաստանի նախկին նախագահները՝ Սերժ Սարգսեանն ու Ռոբերտ Քոչարեանը:
Արդարեւ, Ատրպէյճանի ռազմական դատախազութեան յատուկ հետաքննութիւններու բաժնի ղեկավար Էմիլ Թաղիեւ յայտնեց, որ Քոչարեանի եւ Սարգսեանի հանդէպ հետախուզում յայտարարուած է: Անոնք կը հետախուզուին 1988էն ծաւալած իրենց գործունէութեանց եւ «հայերուն եւ ատրպէյճանցիներուն միջեւ ազգային թշնամանք եւ ատելութիւն սերմանելու» համար: Բացի ատկէ, ըստ ատրպէյճանական դատախազութեան ներկայացուցիչին, «Քոչարեան եւ Սարգսեան 2 Սեպտեմբեր 1991ին հռչակեցին Լեռնային Ղարաբաղի Հանրապետութիւնը, Շահումեանի շրջանը անօրինականօրէն կցեցին Լեռնային Ղարաբաղին»:
Սարգսեանի գրասենեակը արձագանգեց Թաղիեւի յայտարարութեան՝ դիտել տալով, որ Սարգսեանի նկատմամբ ալիեւեան վարչակարգին մեղադրանք առաջադրելը ինքնին զաւեշտ է:
Միւս կողմէ, Արցախի Ազգային անվտանգութեան ծառայութիւնը յայտարարութեամբ մը անդրադարձաւ Ատրպէյճանի դատախազութեան կողմէ Արցախի նախագահը պատասխանատուութեան ենթարկելու վերաբերող հաղորդագրութեան, որուն լոյսին տակ Արցախի հասարակութեան մօտ յառաջացած է մտահոգութիւն, վստահեցնելով, որ Արցախի Ազգային անվտանգութեան ծառայութիւնը ի զօրու է ապահովելու թէ՛ պետական պաշտօնատարներու եւ թէ Արցախի իւրաքանչիւր քաղաքացիի եւ Արցախ այցելած անձերուն անվտանգութիւնը:
Հայաստանի գլխաւոր դատախազի խորհրդական Գոռ Աբրահամեան դիտել տուաւ, որ Պաքուի կողմէ Հայաստանի եւ Արցախի քաղաքացիներուն դէմ քրէական հետապնդումները անօրինական են ու անհիմն:
«Այդ գործողութիւններն ունեն քաղաքական շարժառիթներ, նաեւ պատերազմի հիմքում ընկած ատելութեան, ազգային խտրականութեան, թշնամանքի դրսեւորումներն են, որոնք առ այսօր շարունակւում են: Ինչ վերաբերում է նրան, թէ դատախազութիւնն ինչ միջոցներ է ձեռնարկում, ասեմ, որ բոլոր այն դէպքերում, երբ մենք նման տեղեկութիւն ենք ստանում, մեր միջազգային գործակցութեան գործիքակազմի կիրառմամբ, համապատասխան խողովակներով քայլեր են իրականացւում, որպէսզի միջազգային հետախուզման հետ կապուած իրենց նախաձեռնութիւններն այդ շրջանակներում որեւէ ընթացք չստանայ», ըսաւ Աբրահամեան:
