Ռուսիան կրնայ առանձին գլուխ ելլել Ուքրանիոյ մէջ ստեղծուած կացութեան հետ եւ Չինաստանի զինուորական օգնութեան կարիքը չունի: «Սփութնիք» կը հաղորդէ, որ այս մասին յայտնած է Չինաստանի արտաքին գործոց նախարարութեան բանբեր Խուա Չունյին:
«Ռուսիա հզօրութեամբ օժտուած մեծ տէրութիւն է: Անիկա Չինաստանի կամ այլ երկրի աջակցութեան կարիքը չունի», յայտարարած է ան մամլոյ ասուլիսի ընթացքին` պատասխանելով արեւմուտքցի լրագրողի մը հարցումին, թէ արդեօք Պէյճինկ Ուքրանիոյ մէջ տիրող կացութեան լոյսին տակ Մոսկուային զինուորական օգնութիւն կը ցուցաբերէ՞:
Չինացի դիւանագէտը նշած է, որ հարցին վերաբերեալ Պէյճինկի դիրքորոշումը կը տարբերի ամերիկեան ղեկավարութեան տեսակէտներէն:
«Ռուսիոյ իշխանութիւնը որոշած է Ուքրանիոյ մէջ զինուորական գործողութիւն կատարել առանձին` առանց Չինաստանի կարծիքը հարցնելու», յայտարարած է Չինաստանի արտաքին գործոց նախարարութեան բանբերը:
«Ռուսիան անկախ եւ առանձին կը գործէ` առաջնորդուելով սեփական զինուորական որոշումներով, ան որեւէ քայլ ձեռնարկելէ առաջ Չինաստանի համաձայնութիւնը հարցնելու կարիք չունի», ընդգծած է Չունյի: