Լիբանան կը գտնուի երեսփոխանական ընտրութիւններուն թեկնածութիւն ներկայացնելու ժամկէտի աւարտի սեմին, այս զարգացումներուն լոյսին տակ խորհրդարանի նախագահ Նեպիհ Պըրրի երկուշաբթի, 14 մարտ 2022-ին, կէսօրէ ետք ժամը 3:00-ին, Այն Թինէի մէջ հրաւիրեց մամլոյ ասուլիսի մը, որուն ընթացքին պիտի անդրադառնայ Լիբանանի երեսփոխանական ընտրութիւններուն:
Միւս կողմէ, հանրապետութեան նախագահ զօր. Միշել Աուն երէկ ընդունեց նոր նշանակուած տեղեկատուութեան նախարար Զիատ Մքերին, որուն յաջողութիւն մաղթեց` ընդգծելով տեղեկատուութեան մարզին կարեւորութիւնը` Լիբանանի դիմագրաւած պատմական այս զգայուն փուլին ընթացքին:
Հանդիպումէն ետք Մքերի յայտնեց, որ Լիբանանի դիմագրաւած տագնապալի իրավիճակը կ’ենթադրէ, որ կառավարութիւնը աշխատի փարատելու քաղաքացիներուն տառապանքը, ինչպէս նաեւ ապահովէ Լիբանանի գերագոյն շահերը:
Աուն ընդունեց նաեւ Լիբանանի մէջ ՄԱԿ-ի բարգաւաճման ծրագիրի նոր նշանակուած պատասխանատու Մելանի Հոյնշթայնը, որուն յաջողութիւն մաղթեց, ինչպէս նաեւ ընդգծեց Լիբանանի եւ ՄԱԿ-ի բարգաւաճման ծրագիրին միջեւ գործակցութիւնը ամրապնդելու կարեւորութիւնը:
Նախագահ Աուն ստորագրեց նաեւ թիւ 8923 հրամանագիրը, որուն հիման վրայ գնդապետ Փիեռ Սաապը կը նշանակուի Զինուորական խորհուրդի անդամ, ինչպէս նաեւ ստորագրեց թիւ 8924 հրամանագիրը, որուն համաձայն, գնդապետ Մոհամետ Մուսթաֆան կը նշանակուի Պաշտպանութեան գերագոյն խորհուրդի ընդհանուր քարտուղար: