Ճարտարարուեստի նախարար Ճորճ Պուչիքեան նախարարութեան կեդրոնին մէջ հանդիպում մը ունեցաւ նախարարութեան եւ Ճարտարարուեստի սեփականատէրերու ընկերակցութեան հետ` ներկայութեամբ ընկերակցութեան փոխնախագահներ Զիատ Պաքտաշի եւ Ժորժ Նասրաուիի եւ այլ պատասխանատուներուն:
Հանդիպումին նպատակն էր ճշդել գործիքակազմ մը, որուն համաձայն կը գործադրուի Լիբանանի մէջ արտադրուող սննդեղէնի արտածումը` ճարտարարուեստի նախարարին տալիք արտօնութեամբ:
Հանդիպումին ընթացքին որոշուեցաւ պաշտպանել սննդեղէնի ապահովութիւնը` տեղական շուկային համար ապահովելով այն հիմնական սննդեղէնն ու հում նիւթերը, որոնք անհրաժեշտ են, իսկ ճարտարարուեստի նախարարութիւնը պիտի ջանայ դիւրացնել արտածումները` սերտելէ ետք համաշխարհային եւ տեղական շուկային պայմանները:
Հանդիպումին մասնակիցները որոշեցին ժողովները բաց պահել, որպէսզի կարելի ըլլայ լիբանանեան սննդեղէնի արտածումին վերաբերող գործառնութիւնները համադրել:
Նշենք, որ նախարար Պուչիքեան հարցազրոյցի մը ընթացքին յայտնեց, որ լիբանանեան սննդեղէնի որոշ համեմատութեան արտածումը արգիլելու նպատակն է զսպել հիմնական սննդեղէնի եւ հում նիւթերու արտածումը:
Այս որոշումին շրջագիծին մէջ, Ճ. Պուչիքեան անդրադարձաւ երեք օր առաջ Պէյրութի նաւահանգիստին մէջ գրաւուած 7300 կալոն բուսական ձէթին, որ պատրաստուած էր արտածումի:
Միւս կողմէ, ճարտարարուեստի նախարարը հաստատեց, որ սակերը հակակշռելու իմաստով դժուարութիւն գոյութիւն ունի` նկատել տալով, որ այդ առումով եւս հանդիպումներ պիտի ունենայ ճարտարարուեստի մարզի եւ հանրախանութներու սեփականատէրերուն հետ:
Նախարար Պուչիքեան շեշտեց, որ նախարարութեան տուած որոշումներն ու որդեգրած դասաւորումները տակաւին սկզբնական վիճակի մէջ կը գտնուին եւ որեւէ ատեն կրնան փոփոխութեան ենթարկուիլ` նկատի առած տագնապին սրումը: «Կրնայ կացութիւնը հասնիլ նաեւ այն աստիճանի, որ նախարարութիւնը պահանջէ որոշ արտադրութիւններու կասեցումը, որպէսզի կարենայ հում նիւթ խնայել` հիմնական արտադրութիւնները շարունակելու համար», ըսաւ Ճ. Պուչիքեան:
Ան նկատել տուաւ, որ արգիլած են կորեկ պարունակող գարեջուրի տեսակի մը արտածումը, որպէսզի կորեկի պահեստը երաշխաւորեն: «Արգիլեցինք նաեւ շաքար պարունակող գինիի տեսակի մը արտածումը եւ արտօնեցինք այն տեսակը, որ միայն խաղողի վրայ հիմնուած է, որպէսզի ապահովենք շաքարի գոյութիւնը», ըսաւ ան:
Ճ. Պուչիքեան ընդգծեց, որ սննդեղէնի արտածումը կը դիւրացնեն այն պահուն, երբ իրենց համար յստակ ըլլայ, թէ լիբանանեան շուկային մէջ 3-4 ամսուան համար բաւարարող հում նիւթի գոյութիւն ունի: «Արտածումի արտօնութեան պահանջները կը հասնին ուղղակի իմ գրասենեակս եւ անոնք մէկ ժամուան ընթացքին կ՛որոշուին: Ցարդ արտածումի 127 արտօնութիւն շնորհած եմ», աւելցուց ան: