Պատուարժան Եկեղեցական, Կրթական ու Ազգային Առաջնորդներ,
Նաեւ դուք ԶՈՒԱՐԹՆՈՑ ԿԵԴՐՈՆԻ Սիրելի եւ Յարգելի Բարեկամներ, Քոյրեր ու Եղբայրներ,
Երեսուն եւ հինգ տարիներէ ի վեր հետեւեցաք Յատուկ Դաստիարակչական մեր միակ հայաշունչ կեդրոնին յառաջխաղացքին։ Իւրաքանչիւր քայլափոխին, Լիբանանի պատերազմին թէ վերականգնումի ջանքերուն, նաեւ վերջին տարիներու յեղաշրջումներուն ու Թագադիր ժահրին առթած վերիվայրումներուն ընթացքին, ձեր ջանքերը միացուցիք Լիբանանի Հայ Համայնքի Ընկերային Ծառայողներու Միութեան այս կառոյցին։
Շնորհիւ Ձեզի, բարեսիրական կազմակերպութիւններու, Ընկերային Գործոց նախարարութեան ներդրումին եւ հոյլ մը նուիրեալ գործակիցներու անշահախնդիր ջանքերուն, իր արդիական դաստիարակչական նստավայրով եւ կազմածներով, Կեդրոնս կը դիմաւորէ իր 35-ամեակը վերանորոգ նուիրումով՝ վստահելով մեր Արարիչին անժամանցելի խոստումներուն՝
«Տէրոջը ողորմութեամբ չհատանք, վասնզի Անոր գթութիւնը չպակսեցաւ. Անոնք ամէն առտու կը նորոգուին, Քու ճշմարտութիւնդ մեծ է։» Ողբք Երեմեայ 3: 22-23
Տնօրէնութիւն