ԵՐԵՒԱՆ, «Արմէնփրէս».- Արցախի Մարդու իրաւունքներու պաշտպանի աշխատակազմը հրապարակեց «2022 թուականի Փետրուար-Մարտ ամիսներուն Ատրպէյճանի կողմէ Արցախի ժողովուրդի իրաւունքներու խախտումներու մասին» եռալեզու (հայերէն, ռուսերէն, անգլերէն) միջանկեալ զեկոյցը: Զեկոյցը ուղարկուեցաւ ԵԱՀԿի Մինսքի խումբի համանախագահներուն, մարդու իրաւունքներու պաշտպանութեան առաջնային յանձնարութիւն ունեցող կառոյցներուն եւ միջազգային իրաւապաշտպան կազմակերպութիւններուն:
Զեկոյցին մէջ հակիրճ անդրադարձ կը կատարուի 9 Նոյեմբեր 2020ի եռակողմ յայտարարութեան ընդունումէն ետք Ատրպէյճանի կողմէ Արցախի բնակչութեան կեանքին, առողջութեան, ֆիզիքական եւ հոգեբանական անձեռնմխելիութեան դէմ կատարուած ոտնձգութիւններուն:
Զեկոյցը պատրաստուած է Մարդու իրաւունքներու պաշտպանի աշխատակազմին կողմէ կատարուած ուսումնասիրութիւններու, զանազան համայնքներ, կրթական եւ առողջապահական հիմնարկներ, քաղաքացիներու բնակավայրեր անոր կատարած այցելութիւններուն, քաղաքացիներու հետ ունեցած զրոյցներուն, պետական լիազօր մարմիններէ ստացուած տեղեկութիւններու հիման վրայ եւ նպատակ ունի փաստագրել Ատրպէյճանի կողմէ Արցախի ժողովուրդի իրաւունքներու խախտման դէպքերը եւ անոնց տարաբնոյթ դրսեւորումները ու միջազգային կառոյցներու եւ իրաւապաշտպան կազմակերպութիւններու ուշադրութիւնը հրաւիրելու Արցախի մէջ ստեղծուած իրավիճակին: