Միջազգային դրամական ֆոնտի բանբեր Ճերի Ռայս յայտնեց, որ Լիբանանի հետ խորհրդակցութիւնները հեզասահօրէն կը յառաջանան` աւելցնելով, որ ինք չի կրնար յաւելեալ մանրամասնութիւններ բացայայտել այդ խորհրդակցութիւններուն մասին:
Ռայս նշեց, որ Միջազգային դրամական ֆոնտի Լիբանան հասած պատուիրակութիւնը կ՛աշխատի լիբանանեան իշխանութիւններուն հետ` յանգելու համար բարեկարգումի այնպիսի ծրագիրի մը, որ կ՛օժանդակէ Լիբանանին եւ լիբանանցիներուն:
Մամլոյ ասուլիսի մը ընթացքին Ռայս յայտնեց, որ Լիբանանի հետ քննարկումները դրական կ՛ընթանան, «սակայն յառաջիկայ փուլին ընթացքին կատարուելիք աշխատանքը կարեւոր է, որովհետեւ Լիբանանի դիմագրաւած մարտահրաւէրները խոր են, բարդ, եւ լուծման համար ժամանակ եւ յանձնառութիւն կ՛ենթադրեն», շեշտեց ան:
Ռայս ընդգծեց, որ ներկայիս լիբանանեան իշխանութիւններուն հետ խորհրդակցող Միջազգային դրամական ֆոնտի պատուիրակութիւնը կը քննէ Լիբանանի տնտեսական իրավիճակը եւ երկրին օժանդակելու ֆոնտին կարելիութիւնները:
Նշենք, որ Միացեալ Նահանգներ հաստատած են, որ ներկայ փուլը շատ դրական եւ ձեռնտու կը նկատեն` Լիբանանի եւ Միջազգային դրամական ֆոնտին միջեւ համաձայնութիւն գոյացնելու:
Միացեալ Նահանգներ կը շեշտեն, թէ իրենց կեցուածքին կը համընկնին նաեւ Լիբանանի մէջ գործող դիւանագիտական շարժման տեսակէտները:
Միացեալ Նահանգներուն համար Լիբանանի տնտեսական կացութիւնը մտահոգիչ է, եւ Ուաշինկթըն ճիգ պիտի չխնայէ նեցուկ կանգնելու համար Լիբանանին: