Լիբանանի մէջ Հայաստանի դեսպան Վահագն Աթաբէկեան երէկ այցելեց հանրօգուտ շինութեանց եւ փոխադրութեան հարցերու նախարար Ալի Համիէի, որուն հետ քննարկեց Հայաստան-Լիբանան երկկողմանի յարաբերութիւնները ամրապնդելու հեռանկարները, ինչպէս նաեւ հանրօգուտ շինութեանց եւ փոխադրութեան հարցերու նախարարութեան ունենալիք ներդրումը, յատկապէս քաղաքացիական օդանաւորդութեան ոլորտին մէջ գործակցութիւնը ամրապնդելու նպատակով:
Այս շրջագիծին մէջ նախարար Համիէ համաձայնութիւն յայտնեց, որ «Ֆլայուան Արմինիա» հայկական օդանաւային ընկերութիւնը շաբաթական դրութեամբ Երեւան-Պէյրութ ուղղակի թռիչքներու սկսի:
Նախարարութեան արտօնութեամբ, «Ֆլայուան Արմինիա» հայկական օդանաւային ընկերութիւնը Հայաստանէն Լիբանան եւ Լիբանանէն Հայաստան շաբաթական երեք թռիչքներ պիտի կատարէ: Իրականութիւն մը, որուն շնորհիւ Հայաստան-Լիբանան յարաբերութիւնները աւելի եւս պիտի ամրապնդուին: