ՍՏԵՓԱՆԱԿԵՐՏ, «Արցախփրէս».- Ռուսիոյ արտաքին գործոց նախարարութեան բանբեր Մարիա Զախարովա` մեկնաբանելով Եւրոպական Միութեան նախաձեռնութիւնը՝ դիտել տուաւ, որ Մոսկուա կը մեկնի այն կէտէն, որ հայ-ատրպէյճանական յարաբերութիւններու կարգաւորման գործընթացը հիմնուած պիտի ըլլայ եռակողմ պայմանաւորուածութիւններուն վրայ՝ Ռուսիոյ, Հայաստանի եւ Ատրպէյճանի ղեկավարներուն միջեւ:
Ան յիշեցուց, որ նախորդ շաբաթ Ռուսիոյ նախագահը Հայաստանի եւ Ատրպէյճանի իր գործընկերներուն հետ քննարկեց այդ պայմանաւորուածութիւններու իրականացման վերաբող հարցեր։ Այս եղած է նիւթը 8 Ապրիլին Մոսկուայի մէջ Ռուսիոյ եւ Հայաստանի արտաքին գործոց նախարարներու բանակցութիւններուն, ինչպէս նաեւ Ռուսիոյ եւ Ատրպէյճանի արտաքին գործոց նախարարներու հեռաձայնային զրոյցներուն: Այս բոլորին ընթացքին մասնաւորաբար անդրադարձ կատարուած է հայ-ատրպէյճանական սահմանի սահմանազատման, հաղորդակցութեան կապերու ապաշրջափակման եւ խաղաղութեան պայմանագիրի նախապատրաստութեան:
Զախարովա հաստատեց, որ Ռուսիա պիտի շարունակէ համաչափ աջակցութիւն ցուցաբերել Երեւանի եւ Պաքուի միջեւ յարաբերութիւններու կարգաւորման:
Միւս կողմէ, կառավարութեան հետ հարցում-պատասխանի օրակարգին ընթացքին, Հայաստանի արտաքին գործոց նախարար Արարատ Միրզոյեան յայտնեց, որ հայկական կողմը Լեռնային Ղարաբաղի հակամարտութեան կարգաւորումը կը շարունակէ տեսնել ԵԱՀԿի Մինսքի խումբի համանախագահութեան ձեւաչափով։
Ան խօսեցաւ իր եւ Ատրպէյճանի արտաքին գործոց նախարարին միջեւ զրոյցին մասին՝ ատրպէյճանական կողմին նախաձեռնութեամբ կատարուած: «Քննարկել ենք այն, ինչ վերջին 1 տարուայ ընթացքում քննարկուել է եւ արձանագրուել է նաեւ Բրիւսելում երկրների ղեկավարների հանդիպման արդիւնքներով, այն է` սահմանազատման եւ սահմանային անվտանգութեան հարցերով յանձնաժողովի ստեղծման մեխանիզմները (գործիքակազմերը), ինչպէս նաեւ Հայաստանի եւ Ադրբեջանի միջեւ կնքուելիք ենթադրեալ կարգաւորման պայմանագրին ուղղուած բանակցութիւնների մեկնարկի շուրջ երկու կողմերի պատկերացումները», ըսաւ Միրզոյեան:
Ան ընդգծեց, որ երկկողմ բանակցութիւններ տեղի չեն ունեցած, եղած է խօսակցութիւն` բանակցութիւններու մեկնարկին մասին:
Անդրադառնալով ԵԱՀԿի Մինսքի խումբի համանախագահութեան` նախարարը ըսաւ. «Մեր պատկերացումները ԵԱՀԿ Մինսկի խմբի համանախագահութեան վերաբերեալ ամբողջութեամբ մնում են ուժի մէջ: Մենք տեսնում ենք ԼՂի հակամարտութեան կարգաւորումը ԵԱՀԿ Մինսկի խմբի համանախագահութեան ձեւաչափում: Այն կոնֆերանսը (խորհրդաժողովը), որով հիմնադրուել է այդ ձեւաչափը, այդ կոնֆերանսի որոշումը ոչ ոք աշխարհում չի չեղարկել, այն ուժի մէջ է»:
Ան լուսարձակի տակ առաւ այն, որ, դժբախտաբար, համանախագահող երկիրներուն միջեւ հակասութիւնները այս պահուն յայտնի պատճառներով այնքան բարենպաստ չեն, որ կարենան երեքով քննարկում կազմակերպել: «Եւ մենք չենք կարող թոյլ տալ, որ այդ առումով որեւէ վակում (դատարկութիւն) առաջանայ», ըսաւ Միրզոյեան: