15 մայիս 2022-ին նախատեսուող երեսփոխանական ընտրութիւններու ժամկէտին ընդառաջ առկայ խոչընդոտներու հարթումին եւ վերացման ճիգերը կը շարունակուին` մէկէ աւելի մարզերու մէջ: Արդարեւ, հացի տագնապին գծով փուռերու սենտիքայի նախագահ Ահմետ Հթէյթ երէկ հանգստացուց քաղաքացիները, թէ անհրաժեշտ անմիջական ֆինանսաւորումը դասաւորուած է եւ առնուազն մէկ ամսուան հացի պաշարը ապահովուած է առժամաբար` սպասելով աւելի արմատական լուծումներու: Նմանապէս, ուժանիւթի եւ ջուրի հարցերու նախարար Ուալիտ Ֆայեատ Եգիպտոսի մէջ պատկան պատասխանատուներուն հետ կը քննէ Լիբանան փոխանցուելիք ելեկտրականութեան կարգաւորումին մանրամասնութիւնները: Դեղորայքի գծով եւս նախարար Ֆիրաս Ապիատ կը հաւաստէ, թէ պետական աջակցութիւնը պիտի չվերացուի մնայուն, յատկապէս ծանր քրոնիկ հիւանդութիւններու դեղերուն գծով: Այս եւ նման քայլերը կը շարունակուին հրատապ մէկէ աւելի մարզերու գծով, փորձելով քաղաքացիներուն ապրուստի կենցաղային տարրական կարիքները հոգալ: Տակաւի՛ն, ընտրութիւններուն ընդառաջ եւ շնորհիւ տարուող տեղական թէ արտաքին ճիգերուն, «երէկուան հակադիր ու տարակարծիք» կողմեր այսօր ընտրական «դաշինքներով» միացած են, ինչ որ կրնայ ենթահողը պատրաստել յետ ընտրութեանց միջլիբանանեան համախոհական մթնոլորտի հաստատման:
Նաեւ` Քաղաքական Մակարդակի Վրայ
Կենցաղային ու տնտեսական մարզերու կողքին, հարթումի ճիգերը կը շարունակուին նաեւ քաղաքական ոլորտին մէջ: Այս ծիրին մէջ երէկ ուշագրաւ էր` երրորդ օրն ըլլալով, Սէուտական Արաբիոյ դեսպան Ուալիտ Պուխարիի նախաձեռնած ռամատան ամսուան «ֆիթրի սեղան»-ի հաւաքը, որուն «հիւրերն» էին տնտեսական մարզի պատասխանատուները:
Պուխարիի Պաապտա Այցելութիւնը
Նախքան այդ եւ նոյնքան ուշագրաւ քայլ մըն էր դեսպան Ուալիտ Պուխարիի երէկ առաւօտ այցելութիւնը Պաապտայի պալատ, ուր նախագահ զօրավար Միշել Աունի հետ ունեցաւ «սրտբաց» խորհրդակցութիւն: Սէուտցի դեսպանը այս առիթով վերահաստատեց իր երկրին զօրակցութիւնը Լիբանանին, յատկապէս` ներկայի դժուար պայմաններուն մէջ: Դեսպան Պուխարի նաեւ վերահաստատեց ֆրանսական եւ սէուտական միացեալ օժանդակութիւնը Լիբանանին` տարրական վեց մարզերու մէջ:
Արտաքին Գետնի Վրայ Եւս
Դեսպան Ուալիտ Պուխարիի այս մագոգային այցելութիւններն ու խորհրդակցութիւնները ինքնըստինքեան չեն: Փաստօրէն եւ ըստ իրազեկ աղբիւրներու, Ֆրանսայի նախագահ Էմանուէլ Մաքրոն մեծ դեր ունեցած է Ծոցի երկիրները համոզելու` Լիբանանի զօրակցութեան եւ օժանդակութեան մղելու գծով: Այս ծիրին մէջ իմացուեցաւ, թէ ընտրութիւններէն անմիջապէս ետք, Սէուտական Արաբիա երեք միլիառ տոլարի ներդումով պիտի օժանդակէ Լիբանանին: Նմանապէս եւ Ծոցի միւս երկիրները պիտի հետեւին այդ քայլին:
Այլ խօսքով, շրջանին մէջ նախանշանները կը պարզուին «ծլարձակուող համախոհութեան» մը պատկան կողմերուն միջեւ, ուր Լիբանան եւ անոր կայունութիւնը առանցքային տեղ կը գրաւէ: