«Ազդակ»-ի 48-րդ առցանց լսարանը տեղի ունեցաւ հինգշաբթի, 28 ապրիլին, Պէյրութի ժամանակացոյցով ժամը 19:00-ին: Դասախօսեց «Արմինիըն վըրչուըլ քոլեճ»-ի եւ «Սինոփսիս Արմինա»-ի հիմնադիր դոկտ. Երուանդ Զօրեան, նիւթ` «Ցանցային համակարգի մարտահրաւէրներն ու հայկական տեղեկագիտութիւնը` 21-րդ դարուն»: Լսարանը վարեց «Ազդակ»-ի ելեկտրոնային բաժնի աշխատակից Մինաս Հանս Քէհեան:
Դասախօսը նիւթը բաժնած էր հիմնական երեք ուղղութեան`
Ա.- Արհեստագիտութիւն
Բ.- Հաղորդակցութիւն
Գ.- Կրթութիւն
Դոկտ. Զօրեան խօսեցաւ ներկայ տեղեկագիտական ճարտարագիտութեան յատկանիշներուն մասին` շեշտելով, որ անփոփոխ բաժինը ներկայ գործընթացներուն մէջ յարափոփոխութիւնն է, նորարարութեան յարատեւութիւնը:
Դասախօսը արհեստական բանականութեան այսօրուան սլացքին հետ կապուած մանրամասնութիւններ փոխանցեց գիտամատչելի եղանակներով` տուեալներով յագեցած: Այս շրջածիրին մէջ ինքնավար մեքենաներու (ինքնաշարժներու) բանեցման համակարգին մասին ընդհանուր տեղեկութիւններ փոխանցելով` դոկտ. Զօրեան կեդրոնացաւ չիփերու խտացման ուղղութեան վրայ, ծաւալի փոքրացման եւ տեղեկութիններու բազմապատկման առումներով:
Հեռահաղորդակցութիւնը կարեւոր բաժին էր դասախօսութեան մէջ: Մամուլ հասկացողութեան ձեւափոխման հոլովոյթի հակիրճ ներկայացումէն ետք դոկտ. Երուանդ Զօրեան խօսեցաւ փոխներգործօնութեան, մարդ անհատի մամուլի մաս կազմելու այսօրուան իրականութեան եւ ընդհանրապէս վիրթուալ իրականութեան այսօրուան դրութեան մասին:
Հայկական գետնի վրայ դասախօսը երեք կարեւոր իրականացումի մասին խօսեցաւ` Հայ Քոնեքթ , Արմինիըն վրըչուըլ քոլեճ եւ հայ գիտնականներ ու հայկական գիտական ընկերութիւններ համախմբող Արմինիըն վըրչուըլ Պրիճ :
Դոկտ. Զօրեան դասխօսութեան աւարտին անդրադարձաւ այս մարզին մէջ հետագայ ուղղութեան մասին` «Խելացի ակնոցներով» վըրչուըլ աշխարհ տեղափոխուիլ եւ այդ բոլորին մէջ շեշտեց հայկական կրթութեան մէջ օգտագործելու հրամայականը:
Դասախօսութեան հետեւեցաւ քննարկում:
Շահեկան դասախօսութիւնը ամբողջութեամբ տեղադրուած է «Ազդակ»-ի լսարանի եութուպեան ալիքին վրայ: