Հայաստանի Վարչապետը Հանդիպեցաւ Իրանի Նախագահին Հետ

Իրանի Իսլամական Հանրապետութեան նախագահի նստավայրին մէջ, 10 Հոկտեմբերին տեղի ունեցաւ Հայաստանի վարչապետ Կարէն Կարապետեանի եւ Իրանի նախագահ Հասան Ռոհանիի հանդիպումը:

Կարէն Կարապետեան շնորհակալութիւն յայտնեց հիւրընկալութեան համար եւ փոխանցեց Հայաստանի նախագահ Սերժ Սարգսեանի ողջոյններն ու բարեմաղթանքները: «Հայաստան շատ կարեւոր կը համարէ հարեւան Իրանի հետ ունեցած ջերմ եւ բարեկամական յարաբերութիւնները, որոնք ունին դարաւոր պատմական լուրջ հիմքեր եւ հիմնուած են փոխադարձ շահերու վրայ: Կրնամ ուրախութեամբ նշել, որ այդ յարաբերութիւնները կը գտնուին բարձր մակարդակի վրայ, եւ երկկողմանի համագործակցութիւնը կը շարունակէ զարգանալ փոխըմբռնումի մթնոլորտի մէջ», ըսաւ Հայաստանի վարչապետը:

Հայաստանի կառավարութեան տեղեկատուութեան եւ հասարակայնութեան հետ կապերու վարչութիւնը կը տեղեկացնէ, թէ Հասան Ռոհանի, ողջունելով Հայաստանի վարչապետ Կարէն Կարապետեանի այցը Իրան՝ յայտնեց, որ անիկա պիտի նպաստէ հայ-իրանեան բարեկամական յարաբերութիւններու յետագայ խորացման՝ զանազան բնագաւառներու մէջ: Իրանի նախագահը ընդգծեց, որ պատրաստակամ է օժանդակելու երկու երկիրներու կառավարութիւններու նախաձեռնութիւններուն, ինչպէս նաեւ համատեղ ծրագիրներու իրականացման:

Զրուցակիցները կարեւոր համարեցին շարք մը ոլորտներու մէջ, մասնաւորապէս ուժանիւթի բնագաւառին, գիւղատնտեսութեան, տեղեկատուական ճարտարագիտութիւններու, զբօսաշրջութեան, Սիւնիք եւ Արաս ազատ տնտեսական գօտիներու, համագործակցութեան խորացումն ու ընդլայնումը եւ երկու երկիրներու միջեւ առեւտրաշրջանառութեան ծաւալներու աճը:

Հայաստանի կառավարութեան ղեկավարը ընդգծեց հայ-իրանեան քաղաքական երկխօսութեան բարձր մակարդակը: Կողմերը անդրադարձան Լեռնային Ղարաբաղի հակամարտութեան կարգաւորման ու տարածաշրջանային խնդիրներուն առնչուող հարցերու: Կարէն Կարապետեան նշեց, որ Հայաստան բարձր կը գնահատէ Իրանի հաւասարակշռուած վերաբերմունքը Լեռնային Ղարաբաղի հիմնահարցին գծով, որ տարածաշրջանային խաղաղութեան եւ անվտանգութեան ապահովման կարեւոր երաշխիքներէն է:

Իրանի նախագահը Հայաստանի նախագահին ու հայ ժողովուրդին փոխանցեց իր ջերմ բարեմաղթանքներն ու բարձր գնահատեց հայ համայնքին դերը երկրի տարբեր ոլորտներու զարգացման գործին մէջ:

Նշենք, թէ վարչապետ Կարէն Կարապետեան Իրանի առաջին փոխնախագահ Էսհաք Ճահանկիրիի հրաւէրով է, որ պաշտօնական այցելութեամբ այցելեց Իրան: Թեհրանի «Մեհրապաղ» օդակայանին մէջ պաշտօնական դիմաւորման արարողութենէն ետք վարչապետ Կարապետեանի գլխաւորած պատուիրակութիւնը ուղղուեցաւ Իրանի թագաւորական «Սաատապատ» պալատ, ուր տեղի ունեցած է Կարէն Կարապետեանի եւ Էսհաք Ճահանկիրիի հանդիպում-առանձնազրոյցը:

Հայաստանի կառավարութեան ղեկավարը բարձր գնահատեց բարեկամ Իրանի հետ ձեւաւորուած սերտ եւ բարի դրացիական յարաբերութիւնները, որոնք կը շարունակեն զարգանալ փոխվստահութեան մթնոլորտի մը մէջ:

«Յոյս ունիմ, որ այս հանդիպումէն ետք մենք նոր շունչ կը հաղորդենք մեր համագործակցութեան եւ մեր օրակարգին վրայ գտնուող բոլոր ծրագիրներուն: Տնտեսական համագործակցութեան անդրադառնալով՝ պէտք է նշեմ, որ անիկա զգալիօրէն կը զիջի մեր երկիրներուն միջեւ գոյութիւն ունեցող բարձր մակարդակի քաղաքական երկխօսութեան: Սակայն աւելի քան վստահ եմ, որ կրնանք նոր յաջողութիւններ արձանագրել մեր համագործակցութեան՝ տնտեսական հարթութեան վրայ», նշեց Կարէն Կարապետեան:

Էսհաք Ճահանկիրին շնորհակալութիւն յայտնեց Հայաստանի վարչապետին իր հրաւէրը ընդունելուն եւ Իրան այցելելու համար ու բարձր գնահատեց երկու երկիրներու յարաբերութիւններու ներկայ մակարդակը: Ան կարեւոր նկատեց երկու դրացի եւ բարեկամ պետութիւններուն միջեւ զանազան բնագաւառներու մէջ տնտեսական յարաբերութիւններու շարունակական զարգացումը եւ վստահութիւն յայտնեց, որ վարչապետ Կարապետեանի պաշտօնական այցելութիւնը կը նպաստէ տնտեսական համագործակցութեան ա՛լ աւելի աշխուժացման եւ ընդլայնման:

Հայաստանի վարչապետն ու Իրանի նախագահի առաջին տեղակալը երկկողմանի տնտեսական օրակարգի կարեւոր ծրագիրներէն նկատեցին Իրան-Հայաստան 400 քիլոուաթ լարման ելեկտրահաղորդման 3րդ գիծի կառուցման ծրագիրը, որ կարելիութիւն կու տայ աւելցնելու երկու երկիրներուն միջեւ ելեկտրականութեան եւ կազի փոխանակման ծաւալները՝ նպաստելով թէ՛ երկիրներուն միջեւ տնտեսական յարաբերութիւններու զարգացման, թէ՛ այս բնագաւառին մէջ շրջանային համագործակցութեան ընդլայնման: Կողմերը կարեւոր նկատեցին նաեւ Մեղրիի ջրելեկտրակայանի ծրագիրի իրականացումը:

Իրան-Հայաստան տնտեսական, առեւտրական յարաբերութիւններու զարգացման համար նշանակալի նկատուած է «Սիւնիք ազատ տնտեսական գօտի»ի դերը, վերջինիս եւ իրանեան «Արաս» ազատ գօտիներու համագործակցութիւնը: «Վստահ եմ, որ այս գօտին կրնայ հետաքրքրել թէ՛ իրանեան կազմակերպութիւնները, որոնք կ՛ուզեն դուրս գալ Եւրասիական տնտեսական միութեան եւ եւրոպական շուկաները, քանի որ Հայաստան կը տիրապետէ GSP+ արտօնեալ դրութեան, ինչպէս նաեւ այն ընկերութիւնները, որոնք Իրանի հետ համագործակցութեան սահմանափակումներ կ՛ունենան: Այս շրջագիծին մէջ նաեւ արդիւնաւէտ գործիք կրնայ ըլլալ արտածող-ներածող ընկերութեան ստեղծումը», ընդգծեց վարչապետ Կարէն Կարապետեան՝ աւելցնելով, որ Հայաստանի Հանրապետութեան կառավարութիւնը պատրաստ է աջակցելու ընկերութեան՝ Եւրասիական տնտեսական միութեան շուկայ դուրս գալու հարցով:

Կարէն Կարապետեանի եւ Էսհաք Ճահանկիրիի առանձնազրոյցին յաջորդեց ընդլայնուած կազմով հանդիպումը, որուն ընթացքին քննարկուեցան զանազան մարզերու մէջ համագործակցութեան հեռանկարները:

Հայաստանի եւ Իրանի համագործակցութեան կարեւոր մարզերէն նկատուեցան միջազգային փոխադրական միջանցքներու զարգացումը, տարանցիկ փոխադրումները, Հիւսիս-հարաւ ճամբու միջանցքի ծրագիրի առանձին հատուածներու կառուցման ուղղութեամբ իրանեան կողմի հաւանական մասնակցութիւնը:

Անդրադարձ կատարուեցաւ Հայաստան-Իրան-Թիւրքմենիստան եռակողմ ուժանիւթի բնագաւառին մէջ համագործակցութեան: Կարեւոր նկատուեցաւ երկու երկիրներուն միջեւ աշխոյժ համագործակցութիւնը նաեւ մաքսային մարմիններուն միջեւ:

Վարչապետ Կարապետեան տեղեկացուց, որ Հայաստանի Հանրապետութեան կառավարութիւնը նախաձեռնած է Հայաստան-Իրան սահմանային անցակէտի արդիականացման ծրագիրին:

Անդրադառնալով Իրան-Եւրասիական տնտեսական միութիւն ազատ առեւտուրի համաձայնագիրին շուրջ բանակցութիւններուն՝ Հայաստանի վարչապետը յոյս յայտնեց, որ գործընթացը շուտ կ՛աւարտի եւ նշեց, որ հայկական կողմը պատրաստ է ցուցաբերելու անհրաժեշտ աջակցութիւնը:

Կողմերը համակարծիք էին, որ անհրաժեշտ է աշխուժացնել հայ-իրանեան միջկառավարական յանձնախումբի աշխատանքները՝ պայմանաւորուելով մօտիկ ապագային կազմակերպել հերթական 15րդ նիստը: Հայաստանի վարչապետը եւ Իրանի առաջին փոխնախագահը նաեւ անդրադարձան շրջանային զարգացումներուն: Այս ծիրին մէջ Կարէն Կարապետեան դարձեալ շնորհակալութիւն յայտնեց իրանեան կողմին Լեռնային Ղարաբաղի տագնապին մէջ հաւասարակշռուած դիրքորոշման համար:

Հանդիպումին քննարկուեցան նաեւ տեղեկատուական արհեստագիտութիւններու, կապի, փոխադրամիջոցներու, գիւղատնտեսութեան, զբօսաշրջութեան, կրթութեան եւ մշակոյթի բնագաւառներուն մէջ համագործակցութեան վերաբերող հարցեր:

Կարէն Կարապետեան Էսհաք Ճահանկիրը պաշտօնական այցելութեամբ հրաւիրեց Հայաստան։

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button