Արտաւազդ Փելեշեանը, Նարա Շլեպչեանը, Ռազմիկ Դաւոյեանն ու Ռալֆ Եիրիկեանը՝ «Երեւանի պատուաւոր քաղաքացի»

Երեւանի աւագանին 11 Հոկտեմբերին գումարած արտահերթ նիստի ընթացքին, որ կը վարէր քաղաքապետ Տարօն Մարգարեան, հաստատած է Երեւանի քաղաքապետի առաջարկը` Երեւան քաղաքի 2799-րդ տարեդարձին առթիւ, շարժանկարի զարգացման գործին մէջ ներդրած նշանակալի աւանդին, ակնառու վաստակի, երկարամեայ եւ բեղմնաւոր գործունէութեան համար բեմադրիչ , ՀՀ ժողովրդական արուեստագէտ Արտաւազդ Աշոտի Փելեշեանին «Երեւանի պատուաւոր քաղաքացի» կոչում շնորհելու մասին որոշման նախագիծը:

Երեւանի քաղաքապետարանի տեղեկատուութեան եւ հասարակայնութեան հետ կապերու վարչութենէն կը յայտնեն, որ աւագանիի մէկ այլ որոշումով, Երեւանի 2799-րդ տարեդարձին առթիւ, նկատի առնելով հայկական հեռուստատեսութեան բնագաւառին մէջ ներդրած նշանակալի աւանդը, բազմամեայ վաստակն ու բեղմնաւոր գործունէութիւնը, «Երեւանի պատուաւոր քաղաքացի» կոչում շնորհուած է հաղորդավարուհի, ՀԽՍՀ ժողովրդական արուեստագիտուհի Նարա Սուրէնի Շլեպչեանին:

Երեւանի 2799-րդ տարեդարձին առթիւ, հաշուի առնելով հայ գրականութեան բնագաւառին մէջ ներդրած նշանակալի աւանդը, ակնառու վաստակն ու բազմամեայ գործունէութիւնը, Երեւանի աւագանին քննարկած եւ հաստատած է բանաստեղծ, հասարակական գործիչ Ռազմիկ Նիկողոսի Դաւոյեանին «Երեւանի պատուաւոր քաղաքացի» կոչում շնորհելու մասին որոշման նախագիծը: Աւագանիի մէկ այլ որոշումով, տնտեսութեան զարգացման գործին մէջ ներդրած նշանակալի աւանդի եւ Երեւան քաղաքին մէջ աշխոյժ գործունէութիւն ծաւալելու համար, Երեւանի 2799-րդ տարեդարձին առթիւ, «Երեւանի պատուաւոր քաղաքացի» կոչում շնորհուած է նաեւ «Վիւասել–ՄԹՍ»-ի գլխաւոր տնօրէն Ռալֆ Սեզարի Եիրիկեանին:

Կարդացէք նաև

Leave a Reply

Your email address will not be published. Required fields are marked *

Facebook Iconfacebook like buttonTwitter Icontwitter follow button