ՀԲԸՄ-ՀԵԸ ՎԱՀՐԱՄ ՓԱՓԱԶԵԱՆ ԹԱՏԵՐԱԽՈՒՄԲԸ ԿԸ ՆԵՐԿԱՅԱՑՆԷ ՅԱԿՈԲ ՊԱՐՈՆԵԱՆԻ ՔԱՂԱՔԱՎԱՐՈՒԹԵԱՆ ՎՆԱՍՆԵՐԸ

0
187

Հայ  գրականութեան  մէջ  Յակոբ  Պարոնեանը  եղած է այն հազուագիւտ հեղինակութիւններէն, որուն  գործերը եւ տիպարները յաղթահարած են ժամանակի սահմանը եւ քննութիւնը:  Յակոբ Պարոնեանի  նկարագրած  բարքերը, ստեղծած   տիպարները այսօր ալ  կ’ապրին ու կը շնչեն մեզի հետ:  Անոնք  դարձած են մեր առօրեային, նկարագիրին,կենցաղին եւ իրականութեան  անբաժան  մէկ մասը:

ՀԲԸՄ- ՀԵԸ «Վահրամ Փափազեան»  թատերախումբը   հարազատ մնալով  հայ  բեմին ու մշակոյթին  ծառայելու իր առաքելութեան, Ուրբաթ, 9 Մարտ 2018-էն սկսեալ ( Շաբաթ, 10,  Կիրակի,11, Ուրբաթ,16, Շաբաթ,17 եւ Կիրակի,18 Մարտ),  Յակոբ Տէր Մելքոնեան թատերասրահին մէջ կը ներկայացնէ անմահանուն  գրողին « Քաղաքավարութեան Վնասները» կատակերգութիւնը: Բեմադրութիւն՝ Վարդան Մկրտիչեան: Բեմադրութիւնը  հռչակաւոր  թատերախումբին  58-րդն է լիբանանեան բեմերու վրայ:

Ուրբաթ, 9 Մարտ 2018-ի երեկոյեան, հոծ թիւով թատերասէրերու  ներկայութեան  տեղի ունեցաւ  «Քաղաքավարութեան  Վնասները» ներկայացումին  «Կալա»ն:

Նախքան ներկայացումը, թատերախումբի  վարչութիւնը, անդամները եւ հանդիսատեսները  մէկ վայրկեան յոտնկայս  յարգեցին   լիբանանահայ թատրոնի եւ  ի  մասնաւորի  ՀԲԸՄ-ՀԵԸ «Վահրամ Փափազեան» թատերախումբի  երկարամեայ   վարչական եւ բեմայարդար, նորոգ հանգուցեալ  Մաթիկ Աւագեանի «Ուստա» յիշատակը: Թատերախումբի վարչութեան անդամ  Վազգէն Մուղալեան ամփոփ տողերու մէջ  վեր առաւ հանգուցեալին արժանիքները, ծառայասիրութեան ոգին, խոստանալով վառ պահել անոր  լքած աւանդը:  Կ’արժէ նշել, որ ներկայացումը  նուիրուած էր Մատթէոս Աւագեանի «Ուստա» յիշատակին: ՀԲԸՄ-  ՀԵԸ «Վահրամ Փափազեան»  թատերախումբի վարչութեան ատենապետուհի  Մարօ  Թելվիզեան, յետ մահու՝  երախտագիտական  յուշանուէրով մը պատուեց  Մաթիկ Աւագեանը:

Բեմադրիչ  Վարդան Մկրտիչեան դրուագներու համադրութիւն մը  մատուցեց  հանդիսատեսին:  (Քաղաքավարութեան  Վնասներ»ու զոհերը՝ մեզի նման  սովորական մահկանացուներ  ըլլալով,  ներկաները  կուշտ ու կուռ  խնդացին ստեղծուած   պատկերներուն առջեւ, որոնք  յաճախ երգախառն  ըլլալով, աւելի խանդավառեցին  հանդիսականները:

Բեմին վրայ  յարափոփոխ   տեսարաններ եւ դրուագներ կը  յաջորդէին զիրար:  Վարդան Մկրտիչեան  հմտօրէն  յաջողած էր  կողք կողքի  պատմուածքներ եւ մանրապատումներ  ներկայացնել,  միաժամանակ օգտագործելով լոյսի խաղերը եւ  շրջուն բեմին  կարելիութիւնները: Բեմադրիչը նաեւ   յաջողած էր   հանդիսատեսը անմիջապէս  փոխադրել  դրուագներուն խորքը:  Անոր այս յաջողութեան մեծապէս նպաստած էր   «Վահրամ Փափազեան» թատերախումբի   դերասանական կազմին  փայլուն խաղարկութիւնը: Անվարան  կարելի  յայտնել, թէ  Արփի Աւետիքեանը, Վարդան Մկրտիչեանը,  Յարութ Թորոսեանը,  Եղիա Աւետիքեանը, Քէշիշեան Շուշանը եւ Յարութ Մանուկեանը  լաւապէս  իւրացուցած  ըլլալով իրենց տիպարները, հմայք  կու տային ներկայացումին: Բաւական ինքնավստահ եւ գնահատելի էին  Փամպուքեան  Դալար եւ  Լիլա քոյրերը, յատկապէս իրենց արոգանութեամբ:  Յաջող էր  նաեւ  Գարմէն Պալեանի առաջին   փորձը  թատերախումբին հետ:  Շնորհիւ անոր  ձայնին եւ  կատարողականութեան,  բեմադրիչը երաժշտախառն ներկայացումի վերածած էր  Յակոբ Պարոնեանի  ստեղծագործութիւնը:

Թիւր  տպաւորութիւն  չստեղծուի, որ  մնացեալ դերակատարները  նուազ  համոզիչ  էին իրենց դերերուն մէջ:  Պապահեքեան Հուրին,  Քէշիշեան Էմման,  Ճրճրեան Ռաֆֆին,  Մկրտիչեան Հրակը,  բոլորն ալ  անխտիր,  տպաւորեցին  հանդիսատեսը:

Սրահը   բուռն  ծափերով   գնահատեց   ՀԲԸՄ-ՀԵԸ «Վահրամ  Փափազեան» թատերախումբին կատարողականութիւնը:

Ներկայացումի  որմազդներուն պատրաստութիւնը, պատշաճ  բեմայարդարումը կը պարտինք  Վարդան Մկրտիչեանին: Բեմավար՝ Սեւակ  Նորշահեան, լուսաւորում եւ երաժշտութիւն՝  Գէորգ Նոխուտեան:

Գնահատելի աշխատանք, որուն գլխաւոր դաբնին  բնականաբար կ’երթայ  ՀԲԸՄ-ՀԵԸ-ի Կեդրոնական Վարչութեան,  ՀԲԸՄ-ՀԵԸ  «Վահրամ Փափազեան»  թատերախումբի վարչութեան, բեմադրիչ Վարդան Մկրտիչեանին, դերասանական կազմին  եւ բոլոր այն  անհատներուն, հաստատութիւններուն որոնք  սատարեցին  ներկայացումի  յաջողութեան

ՀԵԸ-Ի ՄԱՄԼՈՅ ԵՒ ԼՐԱՏՈՒԱԿԱՆ  ԳՐԱՍԵՆԵԱԿ

 

 

 

LEAVE A REPLY

Please enter your comment!
Please enter your name here