Յարութեան Տօնը` Անթիլիասի Մայրավանքին Մէջ. «Յարութիւնը Խաչի Զօրութեամբ Տարուած Յաղթանակն Է» Շեշտեց Արամ Ա. Կաթողիկոս

0
76

Կիրակի, 1 ապրիլ 2018-ին, Անթիլիասի մայրավանքը անգամ մը եւս ողողուած էր հաւատացեալներու հոծ բազմութեամբ, որ եկած էր տօնելու Յիսուս Քրիստոսի հրաշափառ Յարութեան տօնը: Ս. Գրիգոր Լուսաւորիչ մայր տաճարին մէջ տեղի ունեցաւ զատկական հայրապետական Ս. եւ անմահ պատարագ, որուն ընթացքին իր հայրապետական պատգամը ուղղեց Արամ Ա. կաթողիկոս: Սուրբ պատարագի երգեցողութիւնը կատարեց Մեծի Տանն Կիլիկիոյ կաթողիկոսութեան «Շնորհալի» երգչախումբը: Հաւատացեալներու կողքին պատարագին ներկայ էին նաեւ համայնքներու հոգեւոր եւ քաղաքական ներկայացուցիչներ:

Վեհափառ հայրապետը իր պատգամին իբրեւ բնաբան ընտրած էր Քրիստոսի այն խօսքը, թէ` «ես յաղթեցի աշխարհին»: Վեհափառ հայրապետը Քրիստոսի այս խօսքէն մեկնելով ըսաւ. «Աստուծոյ Որդին երկիր եկած էր երկինքէն հեռացած երկիրը մօտեցնելու երկինքին, Աստուծմէ հեռացած մարդը մօտեցնելու Աստուծոյ, բարիէն հեռացած մարդը մօտեցնելու բարիին. այլ խօսքով` տիեզերքի ու մարդու Ստեղծիչին, բարութեան աղբիւր Աստուծոյ: Իր այս նպատակը իրագործելու համար Քրիստոս քարոզեց, հրաշագործեց, չարչարուեցաւ, խաչուեցաւ, թաղուեցաւ եւ յարութիւն առաւ: Յարութիւնը խաչի զօրութեամբ տարուած յաղթանակն է: Յաղթանակ` չարով տիրապետուած աշխարհին դէմ, մեղքով գերուած մարդուն դէմ: Քրիստոսի յարութեան յաղթանակը մարդուն վերականգնումն էր, Պօղոս առաքեալին բացատրութեամբ` մարդուն ու տիեզերքին վերստեղծումն էր: Ահա թէ ինչու Քրիստոս ըսաւ` «ես յաղթեցի աշխարհին»: Աշխարհին իր չարով ու չարիքով, մեղքով ու ապականութեամբ յաղթելու իր առաքելութիւնը Քրիստոս իրագործեց յարութեամբ: Հետեւաբար, յարութիւնը յաղթանակի օր է: Երբ քրիստոնեաներ զիրար կ՛ողջունեն ըսելով` «Քրիստոս յարեաւ ի մեռելոց», կը նշանակէ, թէ Քրիստոսի յարութեամբ քրիստոնեաներ չարին ու մեղքին դէմ տարուած յաղթանակը կ՛ողջունեն»: Շարունակելով իր պատգամը` Արամ Ա. կաթողիկոս ըսաւ. «Ո՛չ միայն Յարութեան տօնի նշումով Քրիստոսի յաղթանակը պէտք է ողջունենք, այլ յարութեան զօրութեամբ պէտք է վերանորոգենք մեր հաւատքը եւ հաւատարմութիւնը Քրիստոսի ճամբով աշխարհին յայտնուած արժէքներուն ու սկզբունքներուն»:

Նշենք, որ վեհափառ հայրապետը իր պատգամին սկիզբը ողջունեց Լիբանանի Հանրապետութեան նախագահ զօր. Միշել Աունը, Հայաստանի Հանրապետութեան նախագահ Սերժ Սարգսեանը, Արցախի Հանրապետութեան նախագահ Բակօ Սահակեանը, Ամենայն հայոց Գարեգին Բ. կաթողիկոսը եւ Երուսաղէմի հայոց պատրիարք Նուրհան արք. Մանուկեանը, թեմակալ առաջնորդներն ու ազգային իշխանութիւնները եւ մեր ժողովուրդի բոլոր զաւակները:

Յայտնենք նաեւ, որ Ս. եւ անմահ պատարագի աւարտին, Ս. Զատկուան տօնին առիթով Արամ Ա. կաթողիկոս շնորհաւորանքներ ընդունեց հոգեւոր պետերու, քաղաքական ու ազգային ներկայացուցիչներու եւ բարձրաստիճան պատասխանատուներու կողմէ:

LEAVE A REPLY

Please enter your comment!
Please enter your name here