Մայր Աթոռ Սուրբ Էջմիածինի Մէջ Նշուեցաւ Ս. Յարութեան Տօնը

0
64

1 ապրիլին Քրիստոսի հրաշափառ Յարութեան տօնին առիթով Մայր աթոռ Ս. Էջմիածինի մէջ սուրբ եւ անմահ պատարագ մատուցեց Ամենայն հայոց Գարեգին Բ. կաթողիկոսը:

Սրբազան արարողութիւնը սկսաւ հայրապետական թափօրով, որ վեհարանէն Ամենայն հայոց կաթողիկոսը, Հայաստանի Հանրապետութեան նախագահ Սերժ Սարգսեանը եւ տիկին Ռիթա Սարգսեանը ամպհովանիով առաջնորդեց դէպի մայր տաճար: Ս. Տրդատի կամարի եւ տաճարի զանգակատան առջեւ հոգեւորականներու թափօրին ծափողջոյններով դիմաւորեցին տօնին առիթով Մայր աթոռ հասած հարիւրաւոր ուխտաւորներ:

Հայրապետական ամպհովանին այս տարի կը կրէին Հայաստանի Հանրապետութեան նախագահի խորհրդական Ֆելիքս Փիրումեանը, Վանաձորի քաղաքապետ Մամիկոն Ասլանեանը, Ապարանի քաղաքապետ Կարէն Եղիազարեանը եւ Սարդարապատի համայնքապետ Բաբգէն Վարդանեանը: Անոնց ընտրութիւնը կատարուած էր այս տարի տօնախմբուող մայիսեան հերոսամարտերու 100-ամեակին առիթով:

Ս. պատարագի ընթացքին Ամենայն հայոց կաթողիկոսին իբրեւ առընթերականեր կը սպասաւորէին Մայր աթոռի լուսարարապետ Յովնան եպս. Յակոբեանը եւ Մայր աթոռի վարչական-տնտեսական բաժանմունքի տնօրէն Մուշեղ եպս. Բաբայեանը:

Պատարագի սրբազան արարողութեան ներկայ էին նաեւ նորընտիր նախագահ Արմէն Սարգսեանը, Հայաստանի Հանրապետութեան Ազգային ժողովի նախագահ Արա Բաբլոյեանը, Ազգային ժողովի պատգամաւորներ, կառավարութեան անդամներ, Գերագոյն հոգեւոր խորհուրդի անդամներ, Մայր աթոռի բարերարներ, Հայաստանի մէջ հաւատարմագրուած դիւանագիտական առաքելութիւններու եւ միջազգային կազմակերպութիւններու ղեկավարներ ու ներկայացուցիչներ, կրթութեան եւ մշակոյթի գործիչներ:

LEAVE A REPLY

Please enter your comment!
Please enter your name here