«Պուրճ Համուտ-2018» Փառատօնին Մեծաթիւ Հայեր Ու Օտարներ Համախմբուեցան Լիբանանահայութեան Բաբախուն Սրտին` Պուրճ Համուտի Մէջ

0
87

Երէկ` կիրակի, 15 ապրիլին ուրախ եւ աշխուժ մթնոլորտ կը տիրէր Պուրճ Համուտի մէջ, տարբեր շրջաններէ մեծ թիւով հայորդիներ եւ օտարներ կ’երթեւեկէին Պուրճ Համուտի «Աբրահամ Աշճեան» պողոտային վրայ, ուր տեղի ունեցաւ «Պուրճ Համուտի փառատօն-2018»-ը` հովանաւորութեամբ Հայկական երեսփոխանական գրասենեակին, կազմակերպութեամբ Պուրճ Համուտի բարգաւաճման խորհուրդին եւ մասնակցութեամբ «Սուք Էքըլ»-ին:

Կէսօրէ առաջ ժամը 11:00-ին հայերէնով Հուրի Փափազեան-Էմմիեան, իսկ արաբերէնով Ցոլեր Թալաթինեան բացուած յայտարարեցին փառատօնը` անդրադառնալով անոր ընթացքին ու գործադրուելիք յայտագիրին:

Ամբողջ պողոտային երկայնքով զետեղուած էին տաղաւարներ, ուր կը վաճառուէին հայկական եւ այլ ուտելիքներ եւ իրեր: Փառատօնին ընթացքին նկատի առնուած էին բոլոր տարիքի անհատները անխտիր, անոնց տրամադրուած էին տարբեր յայտագիրներ, կար մանուկներու յատուկ խաղավայր, զետեղուած էին աթոռներ ու սեղաններ, որպէսզի հարազատ միջավայրի մէջ ընտանիքները ճաշեն եւ վայելեն գեղարուեստական ճոխ յայտագիրը, որուն իրենց մասնակցութիւնը բերին նաեւ Համազգայինի երաժշտական քոլեճի աշակերտներ, եւ ամբողջ փառատօնին ընթացքին կար երաժշտութիւն, կը տիրէր խանդավառ մթնոլորտ, կար զումպա, տարբեր ելոյթներ եւ այլն:

Փառատօնին կը մասնակցէին ՀՄԸՄ-ը, ԼՕԽ-ի տարբեր մասնաճիւղեր, «Արցախ ֆոնտ»-ը, Համազգայինի գրատարածը, «Սուք Էքըլ»-ի տարբեր կրպակներ, Պուրճ Համուտի ճաշարաններն ու անհատներ:

Երեկոյեան ժամը 6:00-ին փառատօնի վայր ժամանեցին Լիբանանի հայոց թեմի առաջնորդ Շահէ եպս. Փանոսեան, Պէյրութի հայ կաթողիկէ թեմի օգնական եպիսկոպոս Գէորգ եպս. Ասատուրեան, ՀՅԴ Լիբանանի Կեդրոնական կոմիտէի ներկայացուցիչ, երեսփոխան Յակոբ Բագրատունի, զբօսաշրջութեան նախարար Աւետիս Կիտանեան, Պուրճ Համուտի քաղաքապետ Մարտիկ Պօղոսեան, յառաջիկայ երեսփոխանական ընտրութիւններուն ՀՅԴ-ի առաջադրած թեկնածուներ` Յակոբ Թերզեան, Սերժ Չուխատարեան եւ Ալեքսանտր Մաթոսեան:

Հուրի Փափազեան-Էմմիեան բարի գալուստ մաղթեց պաշտօնական անձնաւորութիւններուն, ինչպէս նաեւ մեծաթիւ ներկաներուն` հաստատելով, որ լիբանանահայութեան մասին խօսելով կարելի չէ նախ չանդրադառնալ Պուրճ Համուտին, որ ո՛չ միայն լիբանանահայութեան, այլեւ համայն սփիւռքի բաբախող սիրտն է, ուր կան ժողովուրդին ծառայող եւ սպասարկող միութիւններն ու կազմակերպութիւնները: Անոր համաձայն, Պուրճ Համուտը առեւտրական կեդրոն ըլլալու կողքին մշակոյթ է, հայկական շունչ ու ոգի է: Հուրի Փափազեան-Էմմիեան դիտել տուաւ, որ այս աննախընթաց փառատօնով անգամ մը եւս լուսարձակի տակ կ’առնուի Պուրճ Համուտին կարեւորութիւնը, լիբանանահայութեան համախմբման վայր ըլլալը, անոր հայեցի դիմագիծի պահպանման անհրաժեշտութիւնը:

Ապա արաբերէնով բոլորին բարի ժամանց մաղթեց Ցոլեր Թալաթինեան, որ իր կարգին անդրադարձաւ այս փառատօնին, ուր համախմբուած են հայկականն ու լիբանանեանը` հաստատելով Պուրճ Համուտի կարեւորութիւնը լիբանանահայ իրականութեան մէջ:

Անկէ ետք իր սրտին խօսքը ուղղելու հրաւիրուեցաւ երեսփոխան Յակոբ Բագրատունի, որ նախ արաբերէնով ողջունեց Պուրճ Համուտի մէջ եւ անկէ դուրս գտնուողները Պուրճ Համուտէն` զայն նկատելով Մեթնի բաբախուն ու աշխուժ երակը, կեանքով լեցուն վայրը, բոլորը հիւրընկալող եւ բոլորին միջեւ համակեցութեան միջավայր եղող շրջանը: Լիբանանեան տարբեր շերտերու ներկայացուցիչներուն Պուրճ Համուտի մէջ համախմբուած ըլլալուն անդրադառնալով` ան ըսաւ, որ ասիկա փաստ է Պուրճ Համուտի աշխուժ, եռուն, կենդանի ըլլալուն, հակառակ անոր որ երբեմն փորձ կը կատարուի շրջանը ժխտական պատկերով ներկայացնելու:

Ապա Յ. Բագրատունի խօսքը շարունակեց հայերէնով` ողջունելով Պուրճ Համուտի բնակիչներն ու բոլոր ներկաները եւ դիտել տալով, որ շրջանը կառուցուած է մեր պապերուն քրտինքով եւ ջանքերով, իսկ այսօր Պուրճ Համուտը հայկական սիրտ է, արիւն է, հայութիւնը պաշտպանած է զայն, հոն պահպանուած է ազգային դիմագիծը: Ուստի, ան կոչ ուղղեց բոլորին` մերժելու Պուրճ Համուտէն ու Դաշնակցութենէն հայութիւնը հեռացնելու ամէն փորձ, որովհետեւ Պուրճ Համուտը հայկական եւ դաշնակցական շրջան է, ուր լիբանանահայութեան գոյատեւման պայքար կը մղուի ամէնօրեայ դրութեամբ: Յ. Բագրատունի յայտնեց, որ ժողովուրդը լաւապէս գիտէ, թէ զինք ո՛վ կը սիրէ, ո՛վ արիւն ու քրտինք թափած է ու կը թափէ լիբանանահայութեան համար եւ արժանի է 6 մայիսին անոր քուէն ստանալու:

Փառատօնի կազմակերպիչ մարմինին`Պուրճ Համուտի բարգաւաճման խորհուրդին կողմէ խօսք առաւ Մելիք Գարագաւորեան, որ անդրադարձաւ այն կարեւորութեան, զոր շրջանը կը ներկայացնէ հայկական իրականութեան մէջ, ուր ապրած ու գործած են Լիբանան հասած մեր պապերը` աւանդը փոխանցելով մեզի: Ան խօսեցաւ Պուրճ Համուտին դիմագիծը պահպանելու կարեւորութեան մասին եւ հաստատեց, որ անիկա պիտի շարունակէ ըլլալ հայութեան անպաշտօն մայրաքաղաքը, եռուն օղակը:

Անկէ ետք մթնոլորտը առաւել եւս ճոխացուցին Շաքէ Պաղտասարեան, Մհեր Չափարեան, Վիգէն Տիշչեքենեան, Գարմէն Աճէմեան, Հրաչ Կայծակեան, Նժդեհ Պոտրումեան, Մանուկ Մինասեան, Լիզա Սվաճեան, Արարատ Ահարոնեան, Յակոբ Մկրտիչեան եւ Ռայան, որոնց նուագակցեցաւ Սեդօ Պաղտասարեան: Անկէ ետք Սէրուժ Պաղտասարեան եւ Ռոյ Մալաքեան մինչեւ երեկոյեան ուշ ժամերը խանդավառեցին մթնոլորտը:

LEAVE A REPLY

Please enter your comment!
Please enter your name here