Նիկոլ Փաշինեան Ներկայացուց Հայաստանի Արտաքին Քաղաքականութեան Շուրջ Իր Պատկերացումը

0
42

Հայաստանի վարչապետի թեկնածու Նիկոլ Փաշինեան կը վստահեցնէ, որ իր՝ վարչապետի պաշտօնին ընտրուելու պարագային, Հայաստան պիտի շարունակէ մնալ Եւրասիական Տնտեսական միութեան եւ Հաւաքական անվտանգութեան պայմանագիրի կազմակերպութեան անդամ: Ազգային ժողովին մէջ վարչապետի ընտրութեան հարցի քննարկումի ընթացքին Նիկոլ Փաշինեան իր ելոյթուն մէջ յայտնեց, որ այդ դիրքորոշումը կը բխի ոչ թէ որեւէ անձի ճաշակէն, ոչ թէ որեւէ անձի դիրքորոշումի փոփոխութենէն, այլ «Հայաստանի ժողովուրդին յաղթանակ բերած համաժողովրդական շարժումի տրամաբանութենէն»:

«Մենք ըսած ենք, որ այս շարժումի արդիւնքով իշխանութեան եկած է ժողովուրդը, եւ ժողովուրդը, շարժումին ընթացքին բազմաթիւ փոփոխութիւններ պահանջելով ներքին կեանքի կազմակերպումին, արդարութեան, օրինականութեան, իրաւունքներու պաշտպանութեան, ընկերային ապահովութեան բնագաւառին մէջ, որեւէ փոփոխութիւն չպահանջեց ու չի պահանջեր արտաքին քաղաքականութեան ոլորտէն ներս: Մենք պարտաւոր ենք հաշիւի նստիլ ժողովուրդի այս ուղերձին հետ», ըսաւ Փաշինեան:

Ան աւելցուց, որ Ռուսիան համարած են եւ կը համարեն ռազմավարական դաշնակից, իսկ համաժողովրդական շարժումը հայ-ռուսական յարաբերութիւններուն համար որեւէ սպառնալիք չի ստեղծեր: «Մենք առանձնայատուկ կարեւորութիւն կու տանք Հայաստան-Իրան եւ Հայաստան-Վրաստան յարաբերութիւններուն: Որեւէ կասկած չկայ, որ քաղաքական այս գործընթացը նոր շունչ ու ներուժ պիտի տայ մեր դրացիներուն հետ մեր յարաբերութիւններուն: Մենք պիտի խորացնենք յարաբերութիւնները Եւրոպական Միութեան հետ եւ այդ կառոյցի անդամ երկիրներուն հետ: Մենք ամէն ինչ պիտի ընենք Հայաստանի քաղաքացիներուն համար Եւրոպական Միութեան մուտքի արտօնագիրի պահանջի վերացման ուղղութեամբ: Կ՛ակնկալենք անոր շուրջ բանակցութիւնները սկսիլ ամենամօտ ապագային», յայտնեց Նիկոլ Փաշինեան:

Ըստ անոր՝ Եւրոպական Միութեան հետ Համապարփակ եւ ընդլայնուած գործընկերութեան մասին համաձայնագիրի շուտափոյթ վաւերացումը եւ կեանքի կոչումը կը բխի Հայաստանի շահերէն:

Փաշինեան անդրադարձաւ նաեւ Միացեալ Նահանգներու հետ յարաբերութիւններուն՝ շեշտելով, որ այդ երկրի հետ բարեկամական յարաբերութիւնները նոր խթանումի կարիք ունին: «Մենք նպատակադրուած ենք յստակ եւ գործնական քայլեր ձեռնարկել Միացեալ Նահանգներու հետ տարբեր ոլորտներու մէջ փոխգործակցութեան զարկ տալու համար: «Պիտի խորացնենք համագործակցութիւնը Չինաստանի հետ եւ արտաքին քաղաքականութեան այս ուղղութիւնը կը համարենք շատ կարեւոր: Մեծ կարեւորութիւն կու տանք աշնան Երեւանի մէջ տեղի ունենալիք Ֆրանսախօսութեան վեհաժողովին, որ անկասկած կը կազմակերպուի բարձր մակարդակով: Հայաստան ամբողջովին պատրաստ է ստանձնել միջազգային այս հեղինակաւոր կազմակերպութեան նախագահութիւնը», ընդգծեց ան:

Նիկոլ Փաշինեան շեշտեց, որ հաւատարիմ են Հայոց Ցեղասպանութեան միջազգային ճանաչումին եւ դատապարտումի գործընթացին, քանզի համոզուած են, որ միայն դատապարտումի միջոցով կարելի է կանխել նման ոճիրներու կրկնութիւնը: «Մարդկութեան դէմ յանցագործութիւններու եւ ցեղասպանութիւններու կանխարգիլման ուղղութեամբ Հայաստան պիտի շարունակէ առաջամարտիկի դեր խաղալ», շեշտեց ան:

Ըստ Փաշինեանի՝ հիմնախնդիրի խաղաղ, միջազգային իրաւունքի վրայ հիմնուած լուծման գործընթացին կարծրատիպերը իրենց համար պարտադիր չեն, կենսական է Արցախի ժողովուրդի՝ իր ճակատագիրը ինքնուրոյն որոշելու անքակտելի իրաւունքի եւ ատոր իրականացման միջազգային ճանաչումը: «Ղարաբաղեան հիմնախնդիրի լուծման առումով մենք յանձնառու ենք բացառապէս խաղաղ լուծման, որուն առանցքը պէտք է ըլլայ ժողովուրդներու իրաւահաւասարութեան եւ ինքնորոշման սկզբունքը: Նոր լիցք պէտք է հաղորդել Արցախի միջազգային ճանաչման գործընթացին, ինչ որ սփիւռքի նախարարութեան կարեւորագոյն գործառոյթներէն մէկը պէտք է դառնայ», ընդգծեց վարչապետի թեկնածուն:

LEAVE A REPLY

Please enter your comment!
Please enter your name here