ՍՈՒՐԲ ԷՋՄԻԱԾՆԻ ԿՐՕՆԱՍԷՐ ՏԻԿՆԱՆՑ ՀԱՄԱԽՄԲՈՒՄԻ 58-ԱՄԵԱԿԻ ՏՕՆԱԿԱՏԱՐՈՒԹԻՒՆ

0
40

ԱՀԱՐՈՆ ՇԽՐՏԸՄԵԱՆ

Ահաւասիկ  կառոյց, որ  Լիբանանի ազգային, հոգեւոր երկնակամարին վրայ  հիմնադրութեան առաջին  օրէն մինչեւ իր այսօրը հաւատարիմ կը մնայ  իր կոչումին եւ առաքելութեան: Ահաւասիկ  կառոյց եւ համախմբում, որուն այսօրը  երաշխիքն է  Հայ եկեղեցւոյ   ի սպաս անոր  վաղուան  ծառայութիւններուն:

1956-ին  հիմնադրուած  Սուրբ Էջմիածնի  Կրօնասէր Տիկնանց Համախմբումը, իւրաքանչիւր  տարի յատուկ հանրագումարի  կը բերէ   ընթացաւարտ տարուան  իր աշխատանքները, կ’արժեւորէ  իր երախտաւորները, նոր եռանդով եւ նոր կորովով  կը  շարունակէ իր գոյերթը դէպի նոր հորիզոններ:

Ի  ներկայութիւն Լիբանանի մէջ Հայաստանի արտակարգ եւ լիազօր դեսպան Սամուէլ Մկրտչեանի, Մայր Աթոռ Սուրբ Էջմիածնի Լուսարարապետ Գերաշնորհ Տէր Յովնան Եպիսկոպոս Յակոբեանի, Դամասկոսի Թեմի Բարեջան Առաջնորդ  Գերաշնորհ Տէր Արմաշ Եպիսկոպոս Նալպանտեանի, Մեծի Տանն Կիլիկիոյ Արժանապատիւ Տէր Պետրոս Վարդապետ Մանուէլեանի,  Մայր Աթոռ Սուրբ Էջմիածնի  Գէորգեան հոգեւոր Ճեմարանի  տեսուչ Արժանապատիւ Տէր Գարեգին Վարդապետ Համբարձումեանի, մեծ թիւով ազգայիններու, բարեկամներու, Կիրակի, 29  Ապրիլ 2018-ի  կէսօրուան ժամը 12-ին,  ՀԲԸՄ-ի  Տեմիրճեան  կեդրոնին մէջ տեղի ունեցաւ Սուրբ Էջմիածնի Կրօնասէր Տիկնանց  Համախմբումի հիմնադրութեան  58- ամեակի  հանդիսութիւնը:

Հանդիսասրահին  սեղանները կը կրէին   Հայաստանի եւ Սփիւռքի  պատմական   եկեղեցիներուն անունը: Սրահի մուտքին, իւրաքանչիւր ամոլ, անձ կ’իմանար  իր սեղանին  անունը: Հոծ բազմութիւն մը գրաւած էր սրահին  քսան երկու սեղանները:  Մօտաւորապէս  երկու հարիւր եօթանասունհինգ  ներկաներ:

Սեղաններուն վրայ զետեղուած էր Ամենայն Հայոց  ՆՍՕՏՏ  Գարեգին  Բ. Կաթողիկոսի խօսքերէն, զանազան տարիներու  յուշանուէր ստացող անդամներու անուանացանկը եւ այլ հետաքրքիր նիւթեր, Համախմբումի գործունէութիւնը  պարփակող գրքոյկ մը, ինչպէս նաեւ սրտափուխ  նուիրատուութիւններու  թղթիկ մը, նշուած, որ  հանդիսութեան հասոյթը պիտի յատկացուէր Սուրբ Էջմիածնի  Հայ Եկեղեցւոյ Երիտասարդաց Միութեան:

 

Համախմբումի վարչութեան անդամ   Անի Պոտրումեան,  բարի գալուստ մաղթեց ներկաներուն: Ներկաները  յոտնկայս ունկնդրեցին  Հայաստանի եւ Լիբանանի քայլերգները,որմէ ետք լիբանանահայ  վաստակաւոր  թենոր Ճոնի Կէոքճեան,դաշնակի վրայ Օլկայ Պոլունի ընկերակցութեամբ մատուցեց «էջմիածին» եւ «Հայրապետական Մաղթանք»ները: Հանդիսութեան  ընթացքին անոնք ներկաները հմայեցին իրենց որակաւոր եւ  ճոխ  երգացանկով:

Համախմբումի ատենապետուհի Տիկին Անահիտ Տանձիկեան փոխանցեց  վարչութեան խօսքը: Ան, քրիստոնէական անհուն սիրով եւ անկեղծ զգացումներով ողջունեց սրահին ներկաները: Ապա համառօտակի ներկայացուց Համախմբումին առաքելութիւնը, անոր հատած 58-ամեայ ճանապարհը: Այս  ծիրին մէջ ան նշեց, թէ  1-8 Սեպտեմբեր  2018-ին,Ամենայն  Հայոց ՆՍՕՏՏ  Գարեգին Բ. Կաթողիկոսի հրաւէրով ուխտագնացութին  մը տեղի պիտի ունենայ  դէպի  Մայր Աթոռ Սուրբ Էջմիածին, որուն արդէն իսկ ցուցակագրուած են 75 անդամուհիներ,ոմանք իրենց ամուսիններուն եւ զաւակներուն ընկերակցութեամբ: Տիկին Անահիտ  Տանձիկեան   յայտնեց Գերաշնորհ եւ Հոգեշնորհ  հայրերուն, պարոն դեսպանին, որոնք իրենց ներկայութեամբ կը պատուեն սոյն  հանդիսութիւնը: Ան երախտագիտութիւն յայտնեց Համախմբումի հանգուցեալ ատենապետուհիներուն, վարչականուհիներուն, անդամուհիներուն եւ բոլոր անոնց, որոնք Հայ Եկեղեցւոյ ծառայութեան ճանապարհին, սատարած են Համախմբումին աշխատանքներուն.

 

Ներկաները  յոտնկայս  ունկնդրեցին Գերաշնորհ Տէր Յովնան Եպս. Յակոբեանի՝Լուսարարապետ Մայր Աթոռ Սուրբ Էջմիածնի, Գարեգին Ա. Կրթական Կեդրոնի տնօրէն,Վանական Խորհուրդի ատենապետ, Մայրավանքի Տեսչութեան տեսուչ, Վերստուգիչ եւ Կարգապահական Յանձնախումբի անդամ ընթերցմամբ՝ ՆՍՕՏՏ Գարեգին Բ. Ամենայն Հայոց կաթողիկոսի Հայրապետական «Գիր  Օրհնութիւն»ը՝  Սուրբ Էջմիածնի Կրօնասէր Տիկնանց Համախմբումին, առ ի գնահատանք անոր   բազմամեայ  բեղուն գործունէութեան:

Ապա բանախօսեց Մայր Աթոռ Ս. Էջմիածնի Գէորգեան Հոգեւոր Ճեմարանին տեսուչ Արժանապատիւ Տէր Գարեգին Վարդապետ Համբարձումեանը: Ան համառօտակի  կատարեց  Մայր Աթոռ Սուրբ  Էջմիածնի եւ Հայորդաց  Տուներու պատմականը, յատկապէս՝  Սուրբ Էջմիածնի դերկատարութիւնը իբրեւ  քրիստոնէական  հաւատքի կեդրոն՝ Հայաստանի եւ  համայնատարած  հայ ժողովուրդի  զաւակներուն մէջ:

Ներկաները մեծ  հետաքրքրութեամբ  պաստառի վրայ հետեւեցան Մայր Աթոռ Սուրբ Էջմիածնի մասին «Շողակաթ» հեռատեսիլի կայանին պատրաստած հաղորդումը։ Հաղորդումը ներկայացուց   Ամենայն  Հայոց ՆՍՕՏՏ  Գարեգին Բ. Կաթողիկոսի  գահակալութեան ժամանակին Սուրբ էջմիածնի մէջ կատարուած  վերաշինութիւնները: Յայտագիրը լուսարձակի տակ առած էր Հայորդաց  Տան մէջ  ջամբուող  հոգեւոր դաստիարակութիւնը:

Հացկերոյթին համադամ եւ  որակաւոր  ճաշերը  կը սպասարկէր  «Մայրիկ»  ճաշարանը:

Խանդավառ մթնոլորտի մէջ  հրապարակ  իջան  վիճակահանութիւնները: Բախտաւորները ստացան արժէքաւոր  նուէրներ:

Շարունակելով  հանդիսութիւնը, դարձեալ յոտնկայս, Դամասկոսի  Թեմի   Բարեջան Առաջնորդ Գերաշնորհ Տէր Արմաշ Եպիսկոպոս Նալպանտեան ընթերցեց Ամենայն  Հայոց ՆՍՕՏՏ․Գարեգին Բ. Ամենայն Հայոց կաթողիկոսի Հայրապետական «Գիր  Օրհնութիւն»ը՝ լիբանանահայ  մտաւորականուհի, հրապարակագիր, հեղինակ Տիկին Ազատուհի Սիմոնեանին։

Երախտագիտութեան  անհուն արտայայտութիւն մըն էր Համախմբումի վարչութեան անունով երկարամեայ  Պատուոյ վարչականուհի Միմի Յարութիւնեանը եւ  ատենապետուհի Անահիտ  Տանձիկեանը յատուկ յուշանուէրով պատուելու  անակնկալը՝  առ ի գնահատական անոնց նուիրեալ եւ  հետեւողական ծառայութիւններուն:

Նոյն պահուն նոյնքան մեծ անակնկալ մըն էր Լիբանանի մէջ Հայաստանի արտակրգ եւ լիազօր դեսպան Սամուէլ Մկրտիչեանի ձեռամբ, Սփիւռքի նախարարութեան ոսկէ  մետալով, լիբանանահայ  հանրածանօթ ազգային, հասարակական ամոլ տէր եւ տիկին  Հրայր եւ Անահիտ Տանձիկեանը պարգեւատրութիւնը:
Ապա տեղի ունեցաւ Համախմբումի երկարամեայ ծառայողներուն պարգեւատրութիւնը:
45-ամեայ  ծառայութեան  համար պարգեւատրում՝
Լիպարիտեան Սիլվա
Սիմոնեան Ազատուհի
Սարգիսեան Ֆրիտա

35-ամեայ  ծառայութեան  համար պարգեւատրում՝
Սարաֆեան Մարինա
Ասիլեան Աղաւնի
Երամեան Լիւսի

30 -ամեայ  ծառայութեան համար պարգեւատրում՝
Գոճաօղլանեան Սեդա
Զենեան Մարօ

25 -ամեայ  ծառայութեան  համար պարգեւատրում՝
Պապոյան Զարուկ
Գոլաճեան Սեդա
Գոլաճեան Վիքի
Բարթիյեան Ազատուհի
Բարթիյեան Զուարդ
Իւրնէշլեան Ծովակ
Ճանճանեան Անժէլ
Խուրի Յասմիկ
Ճեպեճեան Լենա

20- ամեայ  ծառայութեան  համար պարգեւատրում՝
Այվազեան Արինա
Մազլումեան Հռիփ
Ուզունեան Շաքէ

10 -ամեայ  ծառայութեան   համար  պարգեւատրում՝
Եագուպեան Մանուէլ
Սիւնկիւլեան Վերժին
Պուլտուքեան Նարդուհի
Պուլտուքեան Նաթալի
Պուլտուքեան Մարիա
Գուտուզեան Եւա
Շէօհմէլեան Ազնիւ
Սերոբեան Ազատուհի

Շնորհակալական խօսքով  հանդէս եկաւ Համախմբումի ատենապետուհի  Անահիտ Տանձիկեանը: Ան  հերթաբար  ընթերցեց սոյն  հանդիսութեան յաջողութեան նիւթապէս  սատարող բոլոր ազգայիններուն եւ հաստատութիւններուն   անունները:

Հանդիսութեան հուսք բանքը կատարեց Մեծի Տանն Կիլիկիոյ տեղեկատուական  հարցերու  պատասխանատու Հոգեշնորհ Տէր Պետրոս Վարդ․ Մանուէլեանը:Ան  բարձր գնահատեց  Հայ եկեղեցւոյ  ծառայութեան  ճանապարհին  Սուրբ Էջմիածնի Կրօնասէր Տիկնանց  Համախմբումին  բազմամեայ եւ  բազմատեսակ  աշխատանքները:

Սովորական  հացկերոյթ- հանդիսութիւն մը չէր Սուրբ Էջմիածնի Կրօնասէր Տիկնանց  58-ամեակի տարեդարձը, այլ՝ Հայ  եկեղեցւոյ ծառայութեան  համար  ուխտի վերանորոգութեան   հաւաք:

 

LEAVE A REPLY

Please enter your comment!
Please enter your name here