Հայոց Ցեղասպանութեան Մասին Օրինագիծը Կրկին Իսրայէլի Քնեսեթ Ներկայացուած Է

0
75

ԵՐԵՒԱՆ, «ՓանԱրմինիըն».- Իսրայէլացի պատգամաւոր Իցիկ Շմուլի՝ «Սիոնական ճամբար» քաղաքական դաշինքէն, Մայիս 16ին Իսրայէլի խորհրդարանի (Քնեսեթ) քննարկման ներկայացուցած է Հայոց Ցեղասպանութիւնը ճանչնալու մասին բանաձեւի նախագիծը. այս մասին կը հաղորդէ «Ճերուզալէմ Փոսթ»ը՝ աւելցնելով, որ նախագիծը շրջանառութեան մէջ դրուած է Իսրայէլ-Թուրքիա յարաբերութիւններու նորագոյն լարուածութեան պատճառով:

Ըստ Շմուլիի՝ մինչ այսօր Իսրայէլ կը խուսափէր Հայոց Ցեղասպանութիւնը ճանչնալէն, հակառակ անոր որ այդ պատմական փաստը ճանչցած է արդէն 29 երկիր:

«Չենք հանդուրժեր, որ մեզի խրատ կարդայ արիւնոտ ձեռքերով թուրք հակասեմականը, որ ամէն օր հազարաւոր քիւրտեր կը ռմբակոծէ Սուրիոյ հիւսիսը եւ որուն պետութիւնը պատասխանատու է հայ ժողովուրդի Ցեղասպանութեան եւ ասորիներու դէմ պատմական ոճրագործութիւններուն», յայտարարած է Շմուլի:

Նման օրինագիծ մը պատրաստած է նաեւ «Լիքուտ»էն ընտրուած պատգամաւոր Ամիր Օհան:

Իսրայէլի կրթութեան նախարար Նաֆթալի Պենեթ նոյնպէս կոչ ըրած է ճանչնալու Հայոց Ցեղասպանութիւնը, կը հաղորդէ «Հաարեց» թերթը:

«Դիմած եմ Քնեսեթի նախագահին՝ Թուրքիոյ կողմէ իրականացուած Հայոց Ցեղասպանութեան պաշտօնական ճանաչումը Իսրայէլի կողմէ օրինականացնելու համար», ըսած է Պենեթ:

Յիշեցնենք, որ Թուրքիոյ նախագահ Էրտողանը Իսրայէլի կողմէ Կազայի մէջ գործադրուած պաղեստինցիներու նորագոյն սպանդը «ցեղասպանութիւն» որակած էր, որմէ ետք Թուրքիոյ արտաքին գործոց նախարարութիւնը նաեւ Թուրքիոյ մօտ Իսրայէլի դեսպանէն պահանջած էր հեռանալ երկրէն։ Իսրայէլեան լրատուամիջոցներ կը հաղորդեն, որ Մայիս 16ին, Անգարայէն հեռանալու ընթացքին, դեսպանը խիստ խուզարկութեանց ենթակրուած է:

Այս վարկաբեկիչ արարքէն ետք, Իսրայէլի գաղտնի սպասարկութեան հարցերու նախարար Իսրայէլ Քաց եւս ձայնը միացուցած է Հայոց Ցեղասպանութիւնը ճանչնալու կոչերուն՝ աւելցնելով, թէ ոչ մէկ պատճառ կայ, որ Իսրայէլ չճանչնայ այդ պատմական իրողութիւնը։

LEAVE A REPLY

Please enter your comment!
Please enter your name here