«Եթէ Մենք Բոլոր Հարցերը Փորձենք Լուծել, Մենք Բոլոր Հարցերու Լուծումը Կը Ձախողցնենք». Նիկոլ Փաշինեան

0
96

«Եթէ ոեւէ մէկը կ՛ակնկալէ, որ ես պէտք է մտնեմ, քրէակատարողական հիմնարկներու դռներ բանամ, ատիկա ճիշդ մօտեցում չէ»,- այսօր կառավարութեան շէնքի մօտ լրագրողներու հետ ճեպազրոյցի ընթացքին ըսաւ ՀՀ վարչապետ Նիկոլ Փաշինեան` անդրադառնալով «Սասնայ ծռեր»-ը ազատ արձակելու մասին հարցին:

«Կան ընթացակարգեր, կան մարմիններ, որոնք բոլոր հարցերը կը լուծեն»,- “Երկիր մեդիա”-ի փսխանցմամբ՝ ըսաւ ան`  միաժամանակ նշելով, որ պէտք է յստակ ձեւակերպուի, թէ որու դէմ կը կատարուի այդ ամէնը:

«Որեւէ գործողութիւն, որ կը կատարուի, ամենավատը այն է, երբ ձեւակերպուած չէ, թէ անիկա որու դէմ կը կատարուի»,- աւելցուց վարչապետը` միաժամանակ շեշտելով հանրային համերաշխութեան վերաբերեալ իր մօտեցումը:

Անդրադառնալով Երեւանի տարբեր հատուածներու մէջ բողոքի ցոյցերուն ու կառավարութեան դիմաց հաւաքուած մարդոց խնդիրներուն` Փաշինեան նշեց, որ հանգիստ պայմաններու մէջ  պէտք է հարցերը առաջադրել ու զբաղիլ ատոնց լուծումով: «Ի հարկէ, այս տեսարանը միշտ եղած է բոլոր կառավարութիւններու ժամանակ: Մենք գիտենք, որ ճնշումներ գործադրելով շատ ատեն զսպուած են, փակուած են այդ ցոյցերը, հիմա այդ ճնշումներու մեքանիզմը չկայ, մարդիկ ազատ արտայայտուելու իրենց իրաւունքէն կ՛օգտուին։ Ատիկա բնական է, բայց, միւս կողմէն, ես կը կարծեմ, որ պէտք է հասկնանք, որ բոլոր հարցերը մէկ անգամէն լուծելու տրամաբանութիւն չի կրնար գործել: Եթէ մենք բոլոր հարցերը փորձենք լուծել, մենք բոլոր հարցերու լուծումը կը ձախողցնենք»,- ըսած է վարչապետը:

LEAVE A REPLY

Please enter your comment!
Please enter your name here