Բոլորս Պէտք է Լիայոյս Ըլլանք Հայաստանի Ապագայի Հարցով. Տարօն Աճէմօղլու

0
99

Յայտնի հայ տնտեսագէտ Տարօն Աճէմօղլուն վստահ է, որ Հայաստանի մէջ անհրաժեշտ է հասարակական փոփոխութիւն, որ ճանապարհ պիտի բանայ աւելի մրցունակ եւ ուժեղ տնտեսութեան համար: Այս մասին, աշխարհահռչակ տնտեսագէտը խօսած է պոլսահայ «Ակօս» պարբերականի հետ զրոյցի մը ընթացքին՝ անդրադառնալով ՀՀ վարչապետ Նիկոլ Փաշինեանի հետ ունեցած հեռախօսազրոյցին:

Տնտեսագէտին խօսքով՝ Հայաստանի տնտեսութիւնը ազդեցութիւն կրած է կաշառաւերութեան երեւոյթներէն: «Հայաստանի հասարակութեան եւ արտասահմանի մէջ մեծ յոյս կայ, որ այժմ կը գտնուինք շրջադարձային կէտի վրայ: Անհրաժեշտ է հասարակական փոփոխութիւն, որ ճանապարհ պիտի բանայ աւելի մրցունակ եւ ուժեղ տնտեսութեան համար: Իսկ նման փոփոխութեան կրնայ առաջնորդել միայն Հայաստանի հասարակութիւնը»,- ընդգծած է ան:

Տարօն Աճէմօղլու պատմած է, որ ՀՀ վարչապետը հեռաձայնած է իրեն եւ հարցուցած, թէ արդեօք կը փափաքի՞ օգնել: «Իբրեւ այդ երկրէն դուրս գտնուող մէկը՝ չեմ գիտեր, թէ ինչպէս ու որքան պիտի կարենամ օգնել, սակայն ըսի, որ ուրախ պիտի ըլլամ ջանքեր գործադրելու այդ ուղղութեամբ: Կ՝ուզեմ յարմար պահուն այցելել Երեւան, սակայն ընտանեկան պատճառներէ մեկնած՝ դեռ անյայտ են ժամկէտները:

Բոլորս պէտք է լիայոյս ըլլանք Հայաստանի ապագայի հարցով»,- ըսած է Աճէմօղլու` շեշտելով, սակայն, որ միեւնոյն ժամանակ պէտք է ընդունիլ, որ դիւրին պիտի չըլլայ արմատախիլ ընել փտած համակարգը եւ վերափոխել կաշառակերութեան վրայ հիմնուած քաղաքական համակարգը: «Ատիկա հնարաւոր պիտի ըլլայ միայն բազմակողմ մօտեցման եւ նոր, լաւ կրթութիւն ստացած, իտէալիստ ու ոչ կաշառակեր անձերու՝ քաղաքականութիւն մուտք գործելու միջոցով»,- յայտարարած է Տարոն Աճէմօղլու:

Յիշեցնենք, որ ՀՀ վարչապետ Նիկոլ Փաշինեան, Մայիս 13-ին, դիմատետրի իր էջին վրայ յայտնած էր, որ հեռախօսազրոյց ունեցած է Տարօն Աճէմօղլուի հետ: «Ան ըսաւ, որ պատրաստ է աջակցելու Հայաստանին՝ տնտեսութիւնը վերականգնելու եւ զարգացնելու հարցով: Պարոն Աճէմօղլու ընդունեց Հայաստան այցելելու իմ հրաւէրը: Այցին ժամկէտները պիտի ճշտուին յառաջիկային»,- գրած էր Փաշինեան:

Տարօն Աճէմօղլու ծնած է Թուրքիա՝ հայկական ընտանիքի մէջ։ Ուսանած է Մեծ Բրիտանիոյ։ Միացեալ Նահանգներու հեղինակաւոր համալսարաններէն մէկուն՝ Մասաչուսէթսի համալսարանի ճարտարագիտական ուսումնարանի փրոֆէսըր է: Արժանացած է շատ մրցանակներու եւ պարգեւներու:

LEAVE A REPLY

Please enter your comment!
Please enter your name here