Թրքական «Հուրիեթ» պարբերականը անդրադարձած է վերջերս Պոլսոյ մէջ լոյս տեսած Մուրատ Աթաշի «Արմինէ. Չարաք լեռան աքսորը» վէպին, որ կ՛առնչուի Հայոց Ցեղասպանութեան: Այս մասին կը հաղորդէ «Արցախփրես»-ը։
Գիրքին մէջ Աթաշը, հակառակելով թրքական պաշտօնական պատմագրութեան պաշտպանած գիծին, որու համաձայն` թուրքերը մեղաւոր չեն հայերու հետ կատարուածին համար, ցոյց տուած է Հայոց Ցեղասպանութեան գործին մէջ Օսմանեան կայսրութեան իշխանութիւններու մեղաւորութիւն:
Գիրքին հեղինակը պարբերականին տուած հարցազրոյցի ընթացքին նշած է, որ Հայոց Ցեղասպանութեան թեմայի նկատմամբ հետաքրքրութիւնը իր մօտ յառաջացած է դեռ դպրոցական տարիներուն, երբ այս թեմայով ուսումնասիրութիւն մը գրած եւ պատժուած է ուսուցիչին կողմէ:
Մուրատ Աթաշ, յետագային Հայոց Ցեղասպանութեան նիւթով այլալեզու աղբիւրներ ուսումնասիրելէն բացի, հանդիպած եւ թեմայի շուրջ զրուցած է նաեւ Ցեղասպանութիւնը վերապրած շատ հայերու եւ անոնց ժառանգներու հետ:
Մուրատ Աթաշի «Արմինէ. Չարաք լեռան աքսորը» վէպը գլխաւոր հերոսուհի Արմինէի եւ անոր ընտրեալ Ջիւանի սիրոյ պատմութեան միջոցով կը պատմէ ցեղասպանութեան հետեւանքով խեղուած ճակատագիրներու մասին: