Կառավարութիւնը հինգշաբթի օր առաւօտեան նախագահական պալատին մէջ պիտի գումարէ նիստ մը` քննարկելու համար իր աշխատանքային ծրագիրը:
Միւս կողմէ, վարչապետ Հասսան Տիապ երէկ վարչապետարանին մէջ ընդունեց Լումայափոխներու սենտիքայի մէկ պատուիրակութիւնը` գլխաւորութեամբ սենտիքայի նախագահ Մահմուտ Մըրատի:
Հանդիպումէն ետք Մըրատ յայտնեց, որ իրենք շնորհաւորած են Տիապը եւ անոր ներկայացուցած պետական մարզին, դատական իշխանութիւններուն եւ Կեդրոնական դրամատան կառավարիչ Ռիատ Սալամէի հետ իրենց դիմագրաւած դժուարութիւնները` իբրեւ սենտիքա:
Մըրատ նշեց, որ վարչապետ Տիապ դրական նշոյլներու մասին խօսած է` աւելցնելով, որ Լիբանան տնտեսական նոր միջոցառումներ պիտի վկայէ:
Մըրատ շեշտեց, որ ամերիկեան տոլարին դիմաց լիբանանեան դրամանիշին սակը որոշուած է վերածել 2000 լ. ոսկիի` աւելցնելով, որ այս մասին իրենք համաձայնած են Ռիատ Սալամէի հետ, եւ այդ կարգադրութիւնը կ՛ապրի իր փորձառական շրջանը:
«Սակայն շուկային մէջ կարգ մը լումայափոխներ այդ սակով աշխատելու հոլովոյթը կը խախտեն, եւ այդ պատճառով է, որ հարցեր կը ստեղծուին», ըսաւ Մըրատ:
Վարչապետարանի այցելուներէն եղաւ նաեւ Պէյրութի նաւահանգիստի ընդհանուր տնօրէն Հասան Քրայթեմ, որ Տիապի հետ քննարկեց նաւահանգիստին վերաբերող հարցեր:
Վարչապետ Տիապ ընդունեց նաեւ վառելանիւթ բաժնող պատասխանատուներու պատուիրակութիւն մը` նախագահութեամբ Ֆատի Ապու Շաքրայի:
Հանդիպումէն ետք Ապու Շաքրա յայտնեց, որ վարչապետ Տիապի հետ հանդիպումը եղած է դրական` աւելցնելով, որ անոնք քննարկած են վառելանիւթի սակերուն վերաբերող հարցեր` նկատի ունենալով Լիբանանի դիմագրաւած ներկայ տնտեսական իրավիճակը:
«Վարչապետ Տիապ մեզի ապահովութիւն ներշնչեց` խոստանալով, որ խորհրդարանին վստահութեան քուէն ստանալէ ետք, կառավարութիւնը պիտի սերտէ վառելանիւթ բաժնողներուն դիմագրաւած հարցերը», ըսաւ Ապու Շաքրա` աւելցնելով, որ կառավարութիւնը պենզինի թիթեղի սակին վրայ ոչ մէկ տուրքի յաւելում կատարած է:
Տիապի այցելեցին նախկին երեսփոխաններ Նեպիլ Նիքոլա եւ Ապպաս Հաշեմ, որոնք շնորհաւորեցին զայն` նոր կառավարութեան կազմութեան առիթով: Անոնք յաջողութիւն մաղթեցին կառավարութեան` շեշտելով, որ առաջնահերթութիւնը պետութեան եւ քաղաքացիներուն միջեւ վստահութեան վերահաստատումն է:
«Վարչապետ Տիապ այդ վստահութիւնը վերահաստատելու բոլոր յատկանիշները կը լրացնէ», ըսին Նիքոլա եւ Հաշեմ` յոյս յայտնելով, որ Տիապ Լիբանանը ապահով ծովափ հասցնելու դժուար պարտականութեան մէջ կը յաջողի: