ԵՐԵՒԱՆ, «Արմէնփրէս».- Հայաստանի մարդու իրաւունքներու պաշտպան (ՄԻՊ) Արման Թաթոյեան` բացատրական նամակով մը ԵԱՀԿի գործող նախագահին եւ ԵԱՀԿի Մինսքի խումբի համանախագահներուն յատուկ զեկոյց մը ուղարկեց ատրպէյճանցի զինուորներու արարքներով Հայաստանի սահմանային բնակիչներու իրաւունքներու խախտումներուն վերաբերեալ:
Փաստաթուղթերոուն մէջ, յստակ օրինակներով ցոյց կը տրուի, որ ատրպէյճանցի զինուորներու արարքներով, Ատրպէյճանի իշխանութիւններու մտադրուած կազմակերպութեամբ, ամէն օր կ՛ոտնակոխուին Գեղարքունիքի եւ Սիւնիքի մէջ` Հայաստանի սահմանային շրջաններուն մէջ ապրող մարդոց իրաւունքները, կը վտանգուին անոնց ապահովութիւնը եւ բնական կեանքը (բերուած են նաեւ Արարատի մարզի Երասխ համայնքի օրինակները):
«Հետեւաբար, առաջնահերթ գերակայութիւն է մարդկանց համար իրենց նորմալ կեանքը, իրաւունքներն ու անվտանգութիւնը վերականգնելը: Ցոյց ենք տուել նաեւ այդ խախտումների ազդեցութիւնը ՀՀ ողջ բնակչութեան իրաւունքների վրայ: Ընդ որում, զեկոյցում իրաւունքների խախտումները վերլուծուած են` ըստ խմբերի (օրինակ` կեանքի իրաւունք, ազատ տեղաշարժուելու իրաւունք, երեխաների իրաւունքներ եւ այլն): Նշել եմ, որ Սիւնիքում այլընտրանքային ճանապարհները լուծում չեն, քանի որ ապահովուած չէ մարդկանց անվտանգութիւնը. ադրբեջանական զինուած ծառայողները շարունակում են դիտարկման ներքոյ պահել այդ ճանապարհները, քաղաքացիական բնակիչներին, նրանց տները: Աւելին, նրանք զինուած ցուցադրաբար ներկայ են ճանապարհներին, քաղաքացիական բնակիչների համար տեսանելի հատուածներում ու կատարում են մարդկանց իրաւունքները կոպիտ ոտնահարող արարքներ: Հիմնաւորուած է նաեւ, որ սահմանային բնակավայրերում մարդու իրաւունքների խախտումների սնուցող աղբիւրն ադրբեջանական իշխանութիւնների հայատեացութեան հովանաւորչութեան ու թշնամանքի քաղաքականութիւնն է, որը պատերազմից յետոյ ոչ միայն չի նուազել, այլ խորացել է: Ուստի, եզրայանգումը յստակ է` մեր գիւղերի, շատ դէպքերում մարդկանց տների մօտ ու ճանապարհներին ադրբեջանական զինուած ծառայողներ չպէտք է լինեն: Ընդ որում, սա վերաբերում է նրանց բոլոր տեղակայումներին ու ոչ միայն մայիսեան ներխուժումներին: Այսինքն` պէտք է լինի անվտանգութեան ապառազմականացուած գօտի: Սա չի նշանակում, թէ այդ կերպ միանգամից որոշում ենք` ի՞նչ կամ ու՞մ տարածքն է: Դա կ՛որոշուի հետագայում` առնուազն զուգահեռ սկսուած սահմանագծման ու սահմանազատման արդիւնքում: Պարզապէս ներկայում անհրաժեշտ է հրատապ վերականգնել մարդկանց իրաւունքներն ու նորմալ կեանքը:
Օրինակով ցոյց է տրուել, որ ՀՀ մարդու իրաւունքների պաշտպանի առաջարկի հիման վրայ այս գաղափարն արդէն իսկ տեղ է գտել ԵԽԽՎ 2021թ.Սեպտեմբերի 27ի բանաձեւում: Հայաստանի մարդու իրաւունքների պաշտպանի այս մօտեցումներն ուղիղ բխում են ԵԱՀԿ, ՄԱԿ եւ այլ միջազգային պահանջներից ու միջազգային փորձից», կը նշուի Մարդու իրաւունքներու պաշտպան Արման Թաթոյեանի տարածած հաղորդագրութեան մէջ: