ՊՈԼԻՍ, «Ժամանակ»․- Թուրքիոյ արտաքին գործոց նախարար Մեւլուտ Չաւուշօղլու Երեքշաբթի օր հեռաձայնային զրոյց մը ունեցաւ Միացեալ Նահանգներու արտաքին գործոց նախարար Էնթընի Պլինքընի հետ։ Այլ հարցերու կողքին, անոնք անդրադարձան Թուրքիա-Հայաստան յարաբերութիւններու բնականոնացման գործընթացին եւ Չաւուշօղլու հրաւէր ուղղեց Պլինքընին՝ մասնակցելու Անթալիոյ դիւանագիտական հաւաքին, որ նախատեսուած է 11-13 Մարտին։
Ըստ «Անատոլու»ի՝ Չաւուշօղլու լրագրողներու հետ զրուցելու ընթացքին եւս յայտարարութիւններ ըրաւ Թուրքիա-Հայաստան յարաբերութիւններու բնականոնացման գործընթացին վերաբերեալ։ Ան տեղեկացուց, որ Երեւան տակաւին չէ արձագանգած Անթալիոյ դիւանագիտական հաւաքին մասնակցելու ուղղութեամբ Անգարայի հրաւէրին։
Ան խօսեցաւ նաեւ Թուրքիոյ եւ Հայաստանի յատուկ ներկայացուցիչներուն՝ Սերտար Քըլըչի եւ Ռուբէն Ռուբինեանի, Վիեննայի մէջ նախատեսուած յառաջիկայ հանդիպման մասին։ Ըստ անոր՝ Վիեննայի մէջ տեսակցելու նախաձեռնութիւնը եկած է հայկական կողմէն։ Ըստ նախարարին կողմէ փոխանցուած մանրամասնութիւններուն՝ հայկական կողմը առաջարկած է յատուկ ներկայացուցիչներու երկրորդ հանդիպումը կազմակերպել կա՛մ Վիեննայի, կա՛մ Ժընեւի մէջ։