ՀՅԴ Լիբանանի Կեդրոնական կոմիտէի եւ Հայկական երեսփոխանական պլոքի ներկայացուցիչ երեսփոխան Յակոբ Բագրատունի երէկ այցելեց հանրապետութեան նախագահ զօր. Միշել Աունի` լիբանանեան ազգային երկխօսութեան մը կարելիութիւնը քննարկելու նպատակով:
Հանդիպումէն ետք Յ. Բագրատունի Պաապտայէն յայտարարեց, որ անցեալի փորձառութիւնները սորվեցուցած են, որ հարցերու լուծման միակ ուղին երկխօսութիւնն է, ատկէ մեկնած ալ ՀՅԴ-ն եղած է եւ կը շարունակէ մնալ երկխօսութեան հրաւիրողն ու զօրակցողը` ինչ ալ ըլլայ անոր ձեւը:
Ան անդրադարձաւ այն երեւոյթին, որ այսօր, երբ Լիբանան մղձաւանջային օրեր կ՛ապրի եւ արդէն իսկ կը գտնուի անդունդին յատակը, կը դիմենք դուրսի աշխարհին մեզի օժանդակելու եւ մեզ փրկելու լուծումներ գտնելու համար, «բայց եւ այնպէս անհրաժեշտ է, որ ներքին առումով եւս հանդիպինք, քննարկենք եւ երկխօսութիւն ծաւալենք: Այս տրամաբանութենէն մեկնած ալ, եթէ երկխօսութեան հրաւէր ստանանք, պիտի ընդառաջենք եւ աշխատինք զայն յաջողցնելու ի խնդիր: Կառավարութեան եւ ընդհանուր կարգ ու կանոնի բացակայութեան վիճակին մէջ, երկխօսութիւնը կը նկատենք միակ միջոցը երկրին մնացորդացը փրկելու», հաստատեց ան:
Բագրատունի կոչ ուղղեց որեւէ վէճէ եւ սադրանքէ խուսափելու, Պաապտայի մէջ միասնաբար նստելու` հեռու բարձրագոչ յայտարարութիւններէ, մանաւանդ որ ժամանակ չկայ մինչեւ երեսփոխանական ընտրութիւններ սպասելու:
«Քաղաքացին անօթի է, աղքատութիւնը կը թակէ Լիբանանի շերտերուն մեծամասնութեան դռները: Աղքատութիւնը, անարդարութիւնն ու նուաստացումը մեզ կը հասցնեն հոն, ուր չենք ուզեր ըլլալ:
1975-ին փորձեցինք պատերազմը եւ ստիպուած ուղղուեցանք Թաէֆ, 7 մայիսի նախօրեակին զգուշացուցինք սադրանքներէն, որոնք պարտադրեցին իրենք զիրենք, եւ ստիպուած ուղղուեցանք Տոհա», ընդգծեց ան:
Յակոբ Բագրատունի շեշտեց, որ այսօր Լիբանան կը գտնուի ողբերգական կացութեան դէմ յանդիման, ուստի պէտք է խուսափիլ ամէն տեսակի սադրանքէ եւ կռուըտուքէ: «Դուրսի աշխարհին օժանդակութիւնը կ՛ըլլայ` անոր շահերէն մեկնած, ուստի անհրաժեշտ է, որ մենք մեզի օժանդակենք», եզրափակեց Յ. Բագրատունի: