Սիրելի Այնճարցիներ, Հայ Քոյրերս և Եղբայրներս, Աւագ Ուրբաթ է այսօր: Յիշեցի վերջին 17 տարիներուն Աւագ Ուրբաթի “Յիսուսի թաղումն” յուղարկաւորութեան մեր կատարած թափօրները, որոնց խուռներամ ներկայութեամբ կը մասնակցէիք:
Այս տարի, սակայն, բոլորիս ծանօթ պատճառներով և եկեղեցական ու պետական իշխանութիւններէն տրուած հրահանգներուն համապատասխան` ստիպուեցաք մնալ ձեր տուներուն մէջ, զորոնք միշտ, բայց յատկապէս այս ժամանակաշրջանին մէջ, կրնաք դարձնել եկեղեցիներ, երբ ամէն օր միասնաբար կ’աղօթէք իբր ընտանիք:
Տիրոջ հետ խորհրդակցելէս յետոյ` կայացաւ որոշումը, որ այսօր Ինքը` Յիսուս Քրիստոս Տապանակէն ելլէ և շրջագայի մեր Հայաւանին փողոցներէն ու ճամբաներէն, տուներէն և ակումբներէն, դպրոցներէն ու հիմնարկներէն, Քաղաքապետարանէն և Ժողովրդային տունէն, պարտէզներէն ու դաշտերէն` բոլորին և ամենուրեք բաշխելով ԻՐ ԱՍՏՈՒԱԾԱՅԻՆ ՕՐՀՆՈՒԹԻՒՆԸ:
Այնճարի տարածքէն` Ամենասուրբ Հաղորդութեան ճաճանչով կատարեցինք նաև հայադրոշմ անդաստան-օրհնութիւնը Լիբանանի, Հայաստանի, Արցախի, Սփիւռքի և աշխարհի չորս կողմերուն`վստահութեամբ կրկնելով զանոնք ու մեզ իր Ս. ՄԱՐՄԻՆՈՎ ԵՒ Ս. ԱՐԻՒՆՈՎ օրհնող Յարուցեալ Աստուածամարդուն քաջալերիչ խոստումը, որուն յուսավառ սիրով պիտի հաւատանք միշտ, բայց մանաւանդ Քորոնա ժահրին պատճառած վախերուն, վարակումներուն, հիւանդութիւններուն և մահերուն այս շատ վշտալից ժամանակին ընթացքին.”ՄԻ ՎԱԽՆԱՔ, ԵՍ ՅԱՂԹԵՑԻ ԵՒ ԵՍ ՁԵԶԻ ՀԵՏ ԵՄ ԱՄԷՆ ՕՐ ՄԻՆՉԵՒ ԱՇԽԱՐՀԻՆ ԿԱՏԱՐԱԾԸ”:
Ձեզ յանձնելով ի’մ հրաշագործ Սիրամօրս կը մնամ սիրոյ միութեամբ ու քահանայական օրհնութեամբս` Հ. Մեսրոպ Վրդ. Թոփալեան, ձեր աղօթահայց և աղօթարար եղբայրը:
Այնճար, 10 Ապրիլ 2020