Երկրին ամբողջական փակումին դէմ բողոքի ցոյցերը շարունակուեցան նաեւ երէկ լիբանանեան կարգ մը շրջաններու եւ յատկապէս Թրիփոլիի մէջ, ուր ցոյցերը դարձեալ վերածուեցան բախումներու` ցուցարարներուն եւ ապահովութեան ուժերուն միջեւ:
Այս մասին նշանակուած վարչապետ Սաատ Հարիրի յայտնեց, որ Թրիփոլիի ցոյցերուն ետին կրնան գտնուիլ կողմեր, որոնք կը փափաքին քաղաքական պատգամներ ուղղել: Ան աւելցուց, որ կրնան նաեւ գտնուիլ ոմանք, որոնց նպատակն է չարաշահել ժողովուրդին ցաւն ու համեստ դասակարգին ապրուստի տագնապը:
Հարիրի յայտնեց, որ շուկաներն ու պետական հաստատութիւնները քանդելը արդարացուցիչ ոչ մէկ պատճառ կրնայ ունենալ եւ ոչ մէկ ձեւով կարելի է նման քայլ բացատրել` իբրեւ բողոք երկրին ամբողջական փակումին դէմ: «Միւս կողմէ, սակայն, կարելի չէ անտեսել այն իրականութիւնը, որ չկան իրենց օրուան հացը փնտռող քաղաքացիներ, եւ այս իմաստով պետութիւնը դիտորդի դերին մէջ չի կրնար մնալ, այլ` պէտք է նախաձեռնէ կարիքաւոր ընտանիքներուն հատուցումներ ապահովելու», ըսաւ ան:
Հարիրի պետութենէն եւ բոլոր նախարարութիւններէն պահանջեց ժողովուրդին օժանդակել, որպէսզի անիկա կարենայ դիմանալ երկիրը ամբողջական կերպով փակ պահելու որոշումին:
Հարիրի ընդգծեց, որ ամբողջական փակումը քաղաքացիներուն ապահովութեան օգտին տրուած որոշում մըն է, որովհետեւ անիկա կը միտի քաղաքացիները «Քորոնա»-ի համաճարակէն պաշտպանել: «Այդ որոշումին նկատմամբ նախանձախնդիր պէտք է ըլլալ եւ պատասխանատու` պաշտպանելու համար ընկերութեան առողջութիւնը», ըսաւ Հարիրի:
Երէկ կէսօրէ ետք ժամը 4:00-ին Թրիփոլիի մէջ ցուցարարները սկսած էին հաւաքուիլ «Նուր» հրապարակին վրայ` իրենց հետ ունենալով լիբանանեան դրօշներ:
Անոնք լուտանքներ արձակեցին լիբանանցի պատասխանատուներու դէմ եւ պահանջեցին փտածները հաշուետուութեան ենթարկել:
Միաժամանակ մեծ թիւով երիտասարդներ համախմբուեցան Թրիփոլիի սերային դիմաց եւ քարկոծեցին սերայը` Ներքին ապահովութեան ուժերուն ներկայութեան:
Ժամ մը անց ցուցարարներուն եւ ապահովութեան ուժերուն միջեւ արձանագրուեցան բուռն բախումներ, երբ բողոքի ալիք բարձրացնող ցուցարարներէն ոմանք սերային կից գտնուող պահակին յատուկ սենեակը հրկիզեցին եւ սկսան սերայը քարկոծել:
Ապահովութեան ուժերը արցունքաբեր կազերով եւ ջրցան մեքենաներով փորձեցին ցրուել ցուցարարները, սակայն անոնց ջանքերը երկար ատեն ձախողութեան մատնուեցան:
Աւելի ուշ անոնք օդը կրակեցին` ցրուելու համար ցուցարարները, որոնք Թրիփոլիի սերայը մոլոթովներու թիրախ դարձուցին:
Ապահովութեան ուժերը յաւելեալ զօրամասերով ամրացուցին իրենց դիրքերը Թրիփոլիի մէջ, մինչ բախումները շարունակուեցան:
Ներքին ապահովութեան ուժերը երեկոյեան ընկերային ցանցերու վրայ տեղադրուած գրառումով մը յայտնեցին, որ ապահովութեան ուժերուն դէմ արձակուած ռումբերը ձայնային ռումբեր կամ մոլոթովներ չեն, այլ` ձեռնառումբեր, որոնցմէ վիրաւորուած են ապահովութեան ուժերու 9 անդամներ, որոնցմէ 3-ը` սպաներ:
Լիբանանեան Կարմիր խաչը 8 խումբերով աշխատեցաւ վիրաւորները տեղւոյն վրայ դարմանել կամ «Նուր» հրապարակէն հիւանդանոց փոխադրել: Կարմիր խաչը 35 վիրաւորներ փոխադրեց հիւանդանոց եւ 67 ուրիշներ տեղւոյն վրայ դարմանեց:
Լիբանանեան բանակի «Նուր» հրապարակ մուտք գործելէն ետք, Թրիփոլիի մէջ խաղաղութիւնը որոշ ժամանակի համար վերահաստատուեցաւ, սակայն երեկոյեան ժամը 11:00-ին հրապարակին կից թաղերուն մէջ բանակին եւ ցուցարարներուն միջեւ բախումները շարունակուեցան:
Նշենք, որ լիբանանեան բանակը երէկ հրապարակեց հաղորդագրութիւն մը, որ կը նշէ, թէ երեքշաբթի, 26 յունուար 2021-ի գիշերը Թրիփոլիի մէջ ցուցարարներուն հետ արձանագրուած բախումներուն պատճառով վիրաւորուեցան 31 բանակայիններ, ինչպէս նաեւ վնասուեցան զինուորական սարքեր եւ զրահապատներ:
Հաղորդագրութեան մէջ նշուեցաւ, որ բանակը ձերբակալեց 5 յանցագործներ եւ զանոնք յանձնեց համապատասխան դատական իշխանութիւններուն:
Աւելցնենք, որ երէկ բողոքի ցոյցեր եւ ճամբաներու փակումներ արձանագրուեցան նաեւ Սայտայի Էլիա հրապարակին եւ Կեդրոնական դրամատան կեդրոնին դիմաց, Տահր Պայտարի մայրուղիին վրայ, ինչպէս նաեւ Պաալպեքի «Խալիլ Մըթրան» հրապարակին վրայ:
Երեկոյեան ժամը 6:30-ին Սայտայի Էլիա հրապարակին վրայ ցուցարարներուն թիւը սկսաւ բազմանալ: Անոնք բողոքեցին երկրին տնտեսական տագնապին, ամերիկեան տոլարին դիմաց լիբանանեան դրամանիշին արժեզրկումին, սղաճին եւ երկիրը ամբողջութեամբ փակելու որոշումին դէմ:
Երկու ժամ ետք ցուցարարներուն եւ բանակին միջեւ լարուածութիւն արձանագրուեցաւ, երբ բանակը արգիլեց ցուցարարներուն կողմէ ճամբայ փակելու փորձերը:
Ուշ երեկոյեան Ներքին ապահովութեան ուժերը յայտնեցին, որ Պեքաայի մէջ ցուցարարներ փակած են Մասնաայի, Թաալպայայի, Ժտիթայի եւ Մարժի ճամբաները:
Գիշերուան ժամը 10:45-ին, ցուցարարներ անիւներ հրկիզեցին Պէյրութի Ռիատ Սոլհ հրապարակին վրայ, վարչապետարանի պատին կից:
Կէս գիշերին հաղորդուեցաւ, որ ձեռնառումբ մը նետուած է Ներքին ապահովութեան ուժերու Տեղեկահաւաքի բաժանմունքի Թրիփոլիի բաժինի պետին ինքնաշարժին վրայ: Ան եւ իր թիկնապահները փոխադրուած են հիւանդանոց, տարբեր տեսակի վէրքեր ստացած ըլլալու պատճառով: