Հանրապետութեան նախագահ զօր. Միշել Աուն հարցազրոյցի մը ընթացքին յայտնեց, որ կառավարութիւնը նշանակումներ կատարած է` ամբողջացնելու համար Երեսփոխանական ընտրութիւնները կազմակերպող խորհուրդին թափուր մնացած պաշտօնները, «այս իրականութիւնը նկատի ունենալով` իմ խիղճս հանգիստ է, որովհետեւ երեսփոխանական ընտրութիւններուն կայացումը ապահովելու նպատակով բոլոր պարտաւորութիւններս կատարած եմ, իսկ եթէ ոմանք կը փափաքին այդ ընտրութիւններուն կայացումը խոչընդոտել, ապա ատիկա իրեն չի վերաբերիր», յայտնեց ան:
Նախագահ Աուն անդրադարձաւ 1992-ին երեսփոխանական ընտրութիւններուն իր մասնակցութիւնը պոյքոթի ենթարկած քրիստոնեայ համայնքին կեցուածքին` աւելցնելով, որ միակ իրավիճակը, որուն ընթացքին կրնան երեսփոխանական ընտրութիւնները յետաձգուիլ, սիւննի համայնքին կողմէ երեսփոխանական ընտրութիւններուն մասնակցութիւնը պոյքոթի ենթարկելն է:
Նախագահ Աուն յայտնեց, որ լիբանանցիներուն կողմէ երկրին քաղաքական ուժերուն նկատմամբ ցասում կայ, եւ այդ պատճառով ալ հարցախոյզները ցոյց կու տան, թէ «Ո՞վ պիտի ընտրես» հարցումին համար արձանագրուած պատասխաններուն 60 առ հարիւրը «Ոչ մէկը»-ն է:
Նախագահ Աուն յայտնեց, որ Հըզպալլան չէզոքացնել կը նշանակէ ուղղուիլ դէպի քաղաքացիական պատերազմ` աւելցնելով, որ ծովային սահմանագծումի առումով Հըզպալլա կառավարութեան վստահած է այդ աշխատանքը եւ ան կը զօրակցի այն որոշումին, որ կը գոյանայ բանակցութիւններուն ընթացքին:
Նախագահ Աուն հաստատեց, որ Լիբանան իր իրաւունքները պիտի պահէ եւ իր ջուրերուն մէջ գտնուող բնական հարստութիւնը օգտագործելու իրաւունքին համար պիտի պայքարի:
Միւս կողմէ, նախագահ Աուն յայտնեց, որ Լիբանան կը զօրակցի Ռուսիոյ եւ Ուքրանիոյ միջեւ տագնապը քաղաքական բանակցութիւններու ճամբով լուծելու միջոցին: