Հանրապետութեան նախագահ զօր. Միշել Աունի երէկուան բոլոր հանդիպումներուն ընթացքին քննարկումի հիմնական առարկայ դարձան տնտեսական իրադարձութիւնները եւ ելեւմտական կացութիւնը բարելաւելու բանակցութիւնները:
Նախագահ Աուն ընդգծեց, որ ինք կը հաւատայ Լիբանանի յարութեան եւ կ՛աշխատի այդ ուղղութեամբ:
Ան գործակցութեան կոչ ուղղեց բոլորին` հասնելու համար այն նպատակին, որ կը ծառայէ երկրին ու քաղաքացիներուն շահերուն:
Նախագահ Աուն յոյս յայտնեց, որ հանրապետութեան յաջորդ նախագահը գործէ այնպիսի քարտէսի մը հիման վրայ, որ ըլլայ յստակ եւ արտայայտիչ:
Նախագահ Աուն նկատել տուաւ նաեւ, որ միւս կողմէ կան ուժեր, որոնք ելեւմտական հարցեր կը ստեղծեն, ինչպէս նաեւ տոլարի փոխարժէքի սակով կը խաղան: «Այս բոլորը իրենց ժխտական ազդեցութիւնը կ՛ունենան քաղաքացիներուն վրայ: Կան նաեւ տեղական եւ միջազգային տեղեկագիրներ, որոնք կ՛ակնարկեն երկրին կացութիւնը վատթարացնելու նպատակով գործող կողմերու: Այդ կողմերուն մէջ կը գտնուին նաեւ երկրին իշխանութեան մաս կազմող ուժեր, երեւոյթ մը, որմէ լրջօրէն կը տառապինք», ըսաւ նախագահ Աուն:
Հանրապետութեան նախագահը Պաապտայի մէջ ընդունեց գաղթականներու հարցերու նախարար Իսամ Շարաֆէտտինը, որուն հետ քննարկեց սուրիացի տեղահանուածներուն վերաբերող հարցեր:
Հանդիպումէն ետք Շարաֆէտտին յայտնեց, որ նախագահ Աուն կ՛առաջարկէ գործնական ծրագիր մը, որուն նպատակն է ՄԱԿ-էն պահանջել, որ սուրիացի տեղահանուածներուն տրուին Սուրիոյ մէջ գտնուող իրենց հողերը:
Նախագահ Աունի այցելեց նաեւ Տնտեսական ընկերային խորհուրդի նախագահ Շարլ Արպիտ, որ յայտնեց, թէ խորհուրդը նախագահ Աունի եւ բոլոր պատասխանատուներուն տրամադրութեան տակ կը գտնուի` տնտեսական եւ կենսոլորտային բնոյթ ունեցող հարցերուն մասին կարծիք տալու իմաստով: