ԵՐԵՒԱՆ, «Արմէնփրէս».- 31 մարտին տեղի ունեցած Արցախի նախագահական ընտրութիւններու երկրորդ փուլ տեղի պիտի ունենայ, որովհետեւ թեկնածուներէն ոչ մէկը յաղթահարած է քուէներուն 50 տոկոս + 1 սահմանը։
1 ապրիլին տուած մամլոյ ասուլիսին ընթացքին այս տեղեկութիւնը փոխանցեց Արցախի Կեդրոնական ընտրական յանձնաժողովի նախագահ Սրբուհի Արզումանեան:
«Թեկնածուներից որեւէ մէկը չի յաղթահարել կողմ քուէարկած ձայների 50 տոկոս+1 թիւը: Պէտք է անցկացուեն ընտրութիւնների երկրորդ փուլի աշխատանքներ: Երկրորդ փուլը տեղի է ունենում քուէարկութիւնից 14 օր յետոյ, այսինքն`այս դէպքում 14 ապրիլին», յայտնեց Արզումանեան:
Ան դիտել տուաւ, որ Արցախի Հանրապետութեան նախագահի ընտրութիւններուն ընտրողներու ընդհանուր թիւը եղած է 104.348, իսկ քուէարկութեան մասնակիցներունը՝ 76.728: Նախագահի ընտրութիւններուն մասնակցած է ընտրողներուն 73,5 տոկոսը, անվաւեր քուէաթերթիկները 2625 էին։
Թեկնածուներէն Վիթալի Բալասանեան հաւաքած է 10.755 ձայն կամ 14,7 տոկոս, Մասիս Մայիլեան՝ 19.360 ձայն կամ 26,4 տոկոս, Արայիկ Յարութիւնեան` 36.076 ձայն կամ 49,26 տոկոս, Դաւիթ Իշխանեան` 1873 ձայն կամ 2,56 տոկոս:
Նախագահական միւս թեկնածուներուն ստացած քուէներուն պատկերը հետեւեալն է՝ Բալայեան Քրիստինէ՝ 202 քուէ կամ 0,3 տոկոս, Ամիրեան Սերգէյ՝ 106 կամ 0,2 տոկոս, Բաբայեան Դաւիթ՝ 587 կամ 0,8 տոկոս, Լալայեան Բելլա՝ 162 կամ 0,2 տոկոս, Խանումեան Հայկ՝ 962 կամ 1,3 տոկոս, Բադասեան Վահան՝ 743 կամ 1 տոկոս, Ղուլեան Աշոտ՝ 1683 կամ 2,3 տոկոս, Իսրայէլեան Ռուսլան՝ 368 կամ 0,5 տոկոս, Դադայեան Աշոտ՝ 198 կամ 0,3 տոկոս, Պօղոսեան Մելսիկ՝ 141 կամ 0,2 տոկոս:
Անվաւեր նկատուած են 2625 քուէաթերթիկներ կամ ընդհանուր թիւին 3,5 տոկոսը: