ԵՐԵՒԱՆ, «Ազատութիւն».- Լեռնային Ղարաբաղի ժողովուրդը պէտք չէ խտրականութեան ենթարկուի իր ծագումին, լեզուին, կրօնքին, քաղաքական կամ այլ համոզումներուն պատճառով: Ժընեւի մէջ՝ ՄԱԿ Մարդկային իրաւունքներու խորհուրդի 49րդ նստաշրջանի բարձրաստիճան նիստին, այս հաստատումը կատարեց Հայաստանի արտաքին գործոց նախարար Արարատ Միրզոյեան:
Միրզոյեան նշեց, որ ՄԱԿը եւ անոր մարմինները օժտուած են համընդհանուր լիազօրութեամբ՝ անվերապահ, անխոչընդոտ, անարգել հասանելիութիւն ունենալու կարիքաւոր մարդոց՝ անկախ անոնց գտնուած վայրէն եւ հանգամանքներէն, կոչ ուղղելով միջազգային հանրութեան՝ «պատասխանատուութիւն ստանձնելու Լեռնային Ղարաբաղի ողջ տարածքում անվերապահ հասանելիութիւն ապահովելու համար»:
«ՄԱԿը մի քանի անգամ դիմում է յղել Ադրբեջանին, որոնցում արծարծւում են Լեռնային Ղարաբաղի հակամարտութիւնում վարձկաններ օգտագործելու, արտադատական մահապատիժների, կամայական ձերբակալութիւնների, բռնի անհետացումների, կրօնական եւ մշակութային ժառանգութեան ոչնչացման վերաբերեալ հարցեր: Ադրբեջանը հրաժարուել է պատշաճ պատասխան տալ եւ փաստօրէն, ընդհանրապէս չի պատասխանել վերջին դիմումներին, ինչը բացայայտ մարտահրաւէր է ՄԱԿի Մարդու իրաւունքների համակարգին», յայտնեց ան:
«Անպատժելիութիւնը յանգեցնում է նոր խախտումների», ընդգծեց Միրզոյեան՝ լուսարձակի տակ առնելով այն, որ Արցախէն բացի, Ատրպէյճան «շարունակում է մարդու իրաւունքների խախտումների իր քաղաքականութիւնը՝ այժմ էլ Հայաստանի Հանրապետութեան սահմանամերձ շրջաններում, որտեղ քաղաքացիական բնակչութիւնը տուժում է Ադրբեջանի զինուած ուժերի շարունակական սադրիչ գործողութիւններից»:
«Հրադադարի հաստատումից 16 ամիս անց Ադրբեջանը շարունակում է պահել 38 հայ ռազմագերիների, այդ թւում՝ քաղաքացիական անձանց, իսկ հարիւրաւոր անյայտ կորածների, այդ թւում՝ տասնեակ բռնի անհետացածների ճակատագրերը մնում են չբացայայտուած», յայտարարեց Միրզոյեան՝ շեշտելով, որ հայութիւնը կը ձգտի հասնիլ հայերու անվտանգ, արժանապատիւ եւ կամաւոր վերադարձին իրենց հայրենի տուները՝ Արցախի ամբողջ տարածքին:
Նախարարը շեշտեց, որ պէտք է անվերապահօրէն գործադրուին 7 Դեկտեմբեր 2021ին Միջազգային դատարանին կողմէ առաջադրուած միջանկեալ միջոցները, որոնք Ատրպէյճանին կը պարտադրեն դադրեցնել հայերուն նկատմամբ ցեղապաշտական եւ խտրական դրսեւորումները, ներառեալ հայկական մշակութային ժառանգութեան ոչնչացումը: «Այս միջոցները գալիս են ապացուցելու Ադրբեջանի հակահայկական քաղաքականութիւնը, այդ թւում՝ վերջինիս ռազմատենչ հռետորաբանութիւնը, ժողովրդին գոյատեւման միջոցներից զրկելը, հայ բնակչութեանն անընդհատ ահաբեկել ու ուժի կիրառման նոր սպառնալիքը: Միայն այս խնդիրների հասցէագրմամբ մենք կարող ենք ապահովել մեր տարածաշրջանում կայունութիւն, խաղաղութիւն, արդարութիւն եւ մարդու համընդհանուր իրաւունքների պաշտպանութիւն», հաստատեց Միրզոյեան:
Նախարարը նաեւ նշեց, որ Հայաստան մտադիր է խորհուրդի այս նստաշրջանին կրկին ներկայացնել ցեղասպանութեան կանխարգելման մասին բանաձեւի նախագիծը։