Հարցազրոյցը Վարեց՝
ՎԱՀՐԱՄ ՊՕՂՈՍԵԱՆ
ԼՂՀ արտաքին գործերի նախարար Կարէն Միրզոյեանը Հոկտեմբերի 26ից Նոյեմբերի 1ը աշխատանքային այցով գտնւում էր Կանադայում: Նախարարն «Արցախփրէս»ի հետ բառացիկ զրոյցում խօսել է այցի նպատակի մասին, անդրադարձել մի շարք կարեւոր հարցերի, այդ թւում նաեւ ադրբեջանցի դիւերսանտների գործով ընթացող դատավարութեանը: «Արմէնփրէս»ը ներկայացնում է հարցազրոյցն ամբողջութեամբ:
ՎԱՀՐԱՄ ՊՕՂՈՍԵԱՆ.- Պարոն նախարար, մամուլից արդէն տեղեկացել ենք, որ Կանադայում արդիւնաւէտ հանդիպումներ էք ունեցել, կը խնդրէինք, որ այդ մասին մի փոքր մանրամասնէիք:
ԿԱՐԷՆ ՄԻՐԶՈՅԵԱՆ.- Նախ նշեմ, որ Կանադա իմ այցի նպատակն էր մասնակցել Հայաստան Համահայկական հիմնադրամի Տորոնտոյի մասնաճիւղի կողմից կազմակերպուող գալա-երեկոյին, որի ընթացքում դրամահաւաք է անցկացուել, եւ հաւաքուած ամբողջ հասոյթն ուղարկուելու է Արցախ՝ մի շարք սոցիալական ծրագրերի իրականացման համար: Մասնաւորապէս, Իւանեան համայնքում կառուցուելու է մանկապարտէզ, գիւղական համայնքներից մէկում՝ համայնքային կենտրոն, կ՛իրականացուեն նաեւ մի շարք այլ ծրագրեր, որոնք մեր բնակչութեան համար շատ կարեւոր են:
Այցի շրջանակներում եղել են նաեւ մի շարք հանդիպումներ թէ՛ տեղի հայկական համայնքային կառոյցների եւ թէ Կանադայի օրէնսդիր իշխանութեան ներկայացուցիչների հետ: Մասնաւորապէս, հանդիպում է տեղի ունեցել Կանադա-Հայաստան բարեկամութիւն խմբի անդամների հետ, ինչպէս նաեւ Քեբեքի նահանգի օրէնսդիր մարմնում ներկայացուած քաղաքական ուժերի ներկայացուցիչների հետ:
Այդ հանդիպումները լաւ հնարաւորութիւն էին ներկայացնելու այն դրական գործընթացները, որոնք առկայ են Արցախում, եւ որոնք մենք պարտաւոր ենք ներկայացնել աշխարհին՝ օգտագործելով բոլոր հնարաւորութիւնները:
Որքան էլ Կանադան հեռու է գտնւում Արցախից, այնուամենայնիւ, ես գտնում եմ, որ մենք կարող ենք ընդհանուր համագործակցութեան եզրեր գտնել:
ՎԱՀՐԱՄ ՊՕՂՈՍԵԱՆ.- Այցի շրջանակներում դուք Օտաւայի Քարլտոն համալսարանում հանդէս էք եկել «Հարաւային Կովկասի տարածաշրջանային անվտանգութիւնը եւ մարդու հիմնարար իրաւունքների պաշտպանութիւնը» թեմայով դասախօսութեամբ: Յայտնի է, որ Քարլտոնը Կանադայի լաւագոյն համալսարանների առաջին տասնեակի մէջ է մտնում, ինչպէս նաեւ, որ այն գիտատեխնիկական ուղղուածութիւն ունի: Հետաքրքիր է՝ ինչո՞վ էր պայմանաւորուած նման ուղղուածութեամբ համալսարանում դասախօսութեամբ հանդէս գալը, քանի որ սովորաբար ԱԳ նախարարները նման դէպքերում նախընտրում են հումանիտար թեքումով համալսարաններ:
ԿԱՐԷՆ ՄԻՐԶՈՅԵԱՆ.- Քարլտոն համալսարանում դասախօսութեամբ հանդէս եմ եկել բուհի հայ ուսանողների միութեան նախաձեռնութեամբ, եւ նման հրաւէր վաղուց արդէն կար: Միջոցառումը բաց էր բոլորի համար, եւ բացի հայ ուսանողներից, նշեմ, օտարազգի ուսանողներ եւս կային, ի դէպ՝ նաեւ այլ բուհերից, ինչը լաւ առիթ էր ներկայացնելու Արցախը: Կարծում եմ, իսկապէս արդիւնաւէտ հանդիպում էր, քանի որ շատ հետաքրքիր հարցեր են հնչել, որոնց վերլուծութիւնը թոյլ է տալիս ճշգրտել մեր մօտեցումները, յատկապէս՝ թէ ինչպէս պէտք է մեր խնդիրները ներկայացնենք արտաքին լսարանին:
Ասեմ նաեւ, որ շատ լաւ տպաւորութիւններ ունեմ կանադահայ համայնքից. նրանք միաւորուած են ազգային գաղափարների շուրջ, եւ այդ ուղղութեամբ շատ կազմակերպուած աշխատանք է իրականացւում, ինչը, անշուշտ, միայն դրուատանքի է արժանի:
ՎԱՀՐԱՄ ՊՕՂՈՍԵԱՆ.- Պարոն նախարար, այս օրերին Ստեփանակերտում՝ ԼՂՀ ընդհանուր իրաւասութեան առաջին ատեանի դատարանում, տեղի է ունենում Յուլիսին Շահումեանի շրջանով ԼՂՀ պետական սահմանն ապօրինաբար հատած ադրբեջանական հետախուզական-դիւերսիոն խմբի դատավարութիւնը: Գաղտնիք չէ, որ այս աղմկահարոյց գործի նկատմամբ մեծ է նաեւ միջազգային հանրութեան ուշադրութիւնը: Արդեօք չէ՞ք գտնում, որ նպատակայարմար է դատական նիստին հրաւիրել միջազգային համապատասխան կազմակերպութիւնների ներկայացուցիչների:
ԿԱՐԷՆ ՄԻՐԶՈՅԵԱՆ.- Չեմ կարծում, որ այդ դատավարութիւնը պէտք է վերածենք քաղաքական շօուի, դա մեր ոճը չէ: Դատական գործի նպատակն է պարզել, թէ ինչպէս է տեղի ունեցել յանցագործութիւնը եւ համապատասխան պատիժ սահմանել մեղաւորների նկատմամբ: Համոզուած եմ, որ դատարանի որոշումը կը լինի օբյեկտիւ ու արդար: Սա դատական գործընթաց է, եւ այն չի կարելի օգտագործել քաղաքական շահարկումների համար:
ԼՂՀ իշխանութիւններն անում են հնարաւորինս, որպէսզի ապահովեն բաց եւ անաչառ դատական գործընթաց, որին ցանկութեան դէպքում կարող են մասնակցել նաեւ միջազգային համապատասխան կազմակերպութիւնների ներկայացուցիչներ:
ՎԱՀՐԱՄ ՊՕՂՈՍԵԱՆ.- Քաղաքական ակտիւ ժամանակահատուածը 2014ի համատեքստում կարծես թէ աւարտին է մօտենում: Ի՞նչ արձանագրումներ կարող ենք անել յատկապէս ղարաբաղեան հիմնախնդրի կարգաւորման գործընթացում եւ, մասնաւորապէս՝ ի՞նչ տուեց նախագահների մակարդակով Փարիզում կայացած հանդիպումը:
ԿԱՐԷՆ ՄԻՐԶՈՅԵԱՆ.- Նախ եւ առաջ դեռ չէի շտապի աւարտել 2014 թուականը, եւ մինչեւ տարեվերջ մենք բաւականաչափ ժամանակ ունենք, որը պէտք է առաւելագոյնս ինտենսիւ օգտագործենք՝ առաջ մղելով մեր արտաքին քաղաքական շահերը եւ նպատակները։ Ի հարկէ, ինչպէս եւ նախորդ տարիներին՝ մեր արտաքին քաղաքական օրակարգի հիմնական հարցը շարունակում է մնալ ադրբեջանա-ղարաբաղեան հակամարտութեան կարգաւորումը, որտեղ, որքան էլ ձգտում ենք առաջընթաց ապահովել, ցաւօք, ադրբեջանական կողմի ապակառուցողական դիրքորոշման պատճառով դեռեւս ցանկալի արդիւնքի չենք կարողանում հասնել:
Ինչ վերաբերում է Հայաստանի եւ Ադրբեջանի նախագահների՝ Փարիզում կայացած վերջին հանդիպմանը, ինչպէս նաեւ դրան նախորդած Նիւպորտի եւ Սոչիի հանդիպումներին, ապա կարող ենք դրանք դրական գնահատել, սակայն այդ ամէնը բաւարար չէ բանակցային գործընթացում լիարժէք առաջընթաց ապահովելու համար:
Մեր դիրքորոշումը մնում է անփոփոխ. բանակցային գործընթացում շօշափելի առաջընթաց կարող ենք ունենալ միայն այն պարագայում, երբ վերականգնուի ԼՂՀ լիարժէք մասնակցութիւնը: Ի հարկէ, այդ հանդիպումները կարեւոր են, որովհետեւ դա գոնէ այն եզակի ձեւաչափն է, որը նպաստում է տարածաշրջանում թէկուզեւ փխրուն, բայց կայունութեան պահպանմանը: Ու թերեւս այս հանդիպումների գլխաւոր խորհուրդն այն է, որ հակամարտութիւնը պէտք է լուծուի բացառապէս խաղաղ ճանապարհով՝ բացառելով որեւէ այլ եղանակ: Դա շատ յստակ եզրայանգում է, եւ դա ոչ միայն համանախագահների տեսակէտն է, այլեւ ԼՂՀ եւ ՀՀ դիրքորոշումը:
ՎԱՀՐԱՄ ՊՕՂՈՍԵԱՆ.- Պարոն Միրզոյեան, որպէս հարցի շարունակութիւն՝ կը խնդրէի մի քանի խօսքով անդրադառնայիք ընթացիկ տարում արտաքին քաղաքականութեան մէջ մեր յաջողութիւններին:
ԿԱՐԷՆ ՄԻՐԶՈՅԵԱՆ.- Ընդհանուր առմամբդ ընթացիկ տարում մենք մեր աշխատանքները շարունակել ենք՝ հիմնուելով նախորդ տարիներին ունեցած ձեռքբերումների վրայ՝ առաջնորդուելով հանրապետութեան նախագահի կողմից մշակուած արտաքին քաղաքականութեան սկզբունքներով:
Մեզ համար յատկապէս շատ կարեւոր են այն դրական զարգացումները, որ ունենք ԼՂՀ ճանաչման գործընթացում, մասնաւորապէս, ինչպէս գիտեք, այս տարի ԱՄՆ Կալիֆորնիա նահանգի եւ եւրոպական մայրցամաքում Բասկերի երկրի կողմից որոշումների տեսքով ճանաչում եւ սատարում է ստացել Արցախի Հանրապետութեան ինքնորոշումը:
Տարուայ ընթացքում շարունակել ենք զարգացնել ապակենտրոնացուած համագործակցութիւնն արտասահմանեան եւ արցախեան քաղաքների միջեւ: Այս ամենը, իմ գնահատմամբ, վկայում է նախ եւ առաջ այն մասին, որ Արցախը ոչ միայն կայացել է որպէս պետութիւն, այլեւ հանդէս է գալիս որպէս պատասխանատու քաղաքական դերակատար, ում հետ պէտք է համագործակցել: Մենք փորձել ենք նաեւ ընդլայնել խորհրդարանական շփումների շրջանակները եւ տարուայ ընթացքում ունեցել ենք բազմաթիւ արտասահմանեան պատուիրակութիւնների այցելութիւններ: Այս համատեքստում առանձնապէս, որպէս կարեւորագոյն զարգացումդ ես կը նշէի Եւրամիութիւն-Արցախ խմբի ձեւաւորման մեկնարկը:
Առհասարակդ մենք փորձում ենք վարել բազմակողմանի քաղաքականութիւն, պահպանել հաւասարապէս զարգացած յարաբերութիւններ բոլորի հետ եւ, իմ խորին համոզմամբ, դրանով են նաեւ պայմանաւորուած մեր արտաքին քաղաքակութեան մէջ առկայ դրական զարգացումները:
Ի հարկէ, այսքանով չենք բաւարարւում, եւ այն բոլոր ձեռքբերումները, որ ունեցել ենք այս ընթացքում, մեզ պարտադրում են աշխատել աւելի մեծ ծաւալով, որպէսզի կարողանանք ապահովել նոր յաջողութիւններ մեր երկրի համար:
ARMENPRESS.am