«Փանորամա».- Վենետիկի 73րդ շարժապատկերի փառատօնի երեք միջազգային դատակազմերը արդէն ձեւաւորուած են: Ըստ «Կինօաշխարհ»ի՝ հիմնական մրցոյթի դատակազմը պիտի գլխաւորէ բրիտանացի բեմադրիչ Սեմ Մենտես, որ առաջին ֆիլմին համար «Օսքար»ի արժանացած աշխարհի վեց բեմադրիչներէն մէկն է։
Փառատօնի «Հորիզոններ» բաժինի դատակազմի նախագահն է ֆրանսահայ բեմադրիչ Ռոպէր Կէտիկեան, որ անցեալ տարի «Ոսկէ Ծիրան» փառատօնի հիմնական մրցոյթի դատակազմի նախագահն էր եւ անոր «Խենթի Պատմութիւն» ֆիլմով բացուեցաւ փառատօնը:
Նշենք, որ «Հորիզոններ» բաժինին մէջ կը ներկայացուին այն ֆիլմերը, որոնք նոր միտումներ կը բերեն համաշխարհային ֆիլմարուեստին մէջ:
«Հորիզոններ» բաժինի դատակազմին մաս կը կազմեն ամերիկացի քննադատ եւ ֆիլմարուեստի պատմաբան, սինեմայի մասին 13 գիրքերու հեղինակ ճիմ Հապըրման, եգիպտացի դերասանուհի, Գահիրէի եւ Արաբական ֆիլմի փառատօներու մրցանակակիր Նելլի Քարիմ, իտալացի նշանաւոր դերասանուհի Վալենթինա Լոտովինի, քորէացի դերասանուհի եւ բեմադրիչ Մուն Սոյ-Ռի եւ հնդիկ բեմադրիչ Ճայթանիա Թամհանէ։
Վենետիկի «Առաջին ֆիլմ»ին համար «Լուիճի տէ Լորենթիսի» մրցանակի՝ «Ապագայի Առիւծ»ի դատակազմի նախագահն է իտալացի դերասան, «Տաւիտ տի Տոնաթելլօ» մրցանակը շահած Քիմ Ռոսի Սթիուըրթ:
Վենետիկի 73րդ շարժապատկերի փառատօնը պիտի կայանայ 31 Օգոստոսէն 10 Սեպտեմբեր: