Հանրապետութեան նախագահ զօր. Միշել Աուն թուիթըրեան գրառումի մը ընդմէջէն շեշտեց, որ հանրապետութեան նախագահութիւնը կարելի չէ վարկաբեկումի թիրախ դարձնել: Ան ցաւ յայտնեց, որ կարգ մը պատասխանատուներ եւ լրագրողներ կ՛անտեսեն սահմանադրութիւնը եւ ազգային մակարդակի վրայ ցաւ պատճառող յայտարարութիւններ կը կատարեն:
«Հանրապետութեան նախագահն է, որ կը կատարէ բանակցութիւնը` միջազգային համաձայնագիրներու հիման վրայ, ապա ան այդ մանրամասնութիւնները կը բաժնէ վարչապետին հետ, ապա կառավարութեան եւ վերջապէս խորհրդարանին հետ, սահմանադրութեան թիւ 52 յօդուածին լոյսին տակ», կը գրէ նախագահ Աուն:
Նախագահ Աուն երէկ ընդունեց Լիբանանի մէջ Միացեալ Նահանգներու դեսպան Տորըթի Շիան, որուն հետ քննարկեց լիբանանեան-ամերիկեան յարաբերութիւններն ու միջազգային զարգացումները, ինչպէս նաեւ ծովային սահմանագծումի թղթածրարը:
Երեկոյեան նախագահ Աուն հեռաձայնային հաղորդակցութիւն մը ստացաւ Միացեալ Նահանգներու արտաքին գործոց նախարարի քաղաքական հարցերու խորհրդական Վիքթորիա Նուլընտէն, որուն հետ նաեւ քննարկեց Լիբանանի ծովային սահմանագծումի թղթածրարը, Սուրիոյ վրայով Եգիպտոսէն ու Յորդանանէն կազ եւ ելեկտրականութիւն ապահովելու հեռանկարները, երեսփոխանական ընտրութիւններուն նախապատրաստութիւնները, ինչպէս նաեւ ռուս-ուքրանական տագնապին զարգացումները:
Միւս կողմէ, նախագահ Աուն կէսօրէ ետք ժամը 3:30-ին նախագահական պալատին մէջ ընդունեց վարչապետ Նեժիպ Միքաթին, որուն հետ քննարկեց լիբանանեան իրադարձութիւնները:
Ապա իշխանութեան պետերուն հանդիպումին միացաւ արտաքին գործոց եւ արտերկրի լիբանանցիներու հարցերու նախարար Ապտալլա Պու Հապիպ:
Հանդիպումէն ետք Պու Հապիպ Պաապտայէն յայտարարեց, որ Լիբանան ՄԱԿ-ի ընդհանուր ժողովէն կը պահանջէ աշխատիլ` ամրապնդելու ռուս-ուքրանական տագնապը խաղաղ բանակցութիւններու միջոցով լուծելու առիթները:
Պու Հապիպ հաստատեց, որ Լիբանան համահունչ կը մնայ Ռուսիա-Ուքրանիա տագնապին մասին անցեալ հինգշաբթի օրուան իր կեցուածքին: