Հանրապետութեան նախագահ զօր. Միշել Աուն Պաապտայի մէջ ընդունեց Դրամատուներու միութեան նախագահ Սելիմ Սֆէյրը եւ Բնակարանային վարկերու յատուկ դրամատան ընդհանուր տնօրէն Անթուան Հապիպը: Քննարկուեցան երկրին ելեւմտական ու դրամատնային իրավիճակը եւ ներկայ փուլին դրամատուներուն դերակատարութիւնը:
Նախագահ Աուն այսօր կէսօրէ ետք պիտի նախագահէ կառավարութեան նիստին:
Միւս կողմէ, խորհրդարանի նախագահ Նեպիհ Պըրրի երէկ կէսօրէ առաջ ժամը 11:00-ին նախագահեց խորհրդարանի օրէնսդրական նիստին, որ տեղի ունեցաւ ԵՈՒՆԵՍՔՕ-ի պալատին մէջ:
Նիստին սկիզբը վարչապետ Նեժիպ Միքաթի խորհրդարանի նախագահէն պահանջեց նիստը վերածել լիագումար նիստի մը` արծարծելու համար կառավարութեան վստահութեան քուէի հարցը, սակայն Պըրրի պատասխանեց ըսելով, որ այս նիստը օրէնսդրական նիստ է` աւելցնելով, որ ինք այդ իմաստով ոչ մէկ առաջարկ ստացած է:
Ապա խորհրդարանը շարունակեց իր նիստը, որուն ընթացքին վաւերացուց երեսփոխանական ընտրութիւնները ֆինանսաւորելու նպատակով ներքին գործոց եւ քաղաքապետութեանց հարցերու նախարարութեան յատկացուելիք յաւելեալ գումարին վերաբերող օրինագիծը: Այդ օրինագիծին շրջագիծին մէջ երեսփոխան Իպրահիմ Քանաան առաջարկեց նաեւ յաւելեալ գումար վաւերացնել` նկատի ունենալով նաեւ լիբանանցիներուն անցագիրները պատրաստելու ֆինանսաւորումը: Քանաանի առաջարկը վաւերացուեցաւ:
Խորհրդարանը վաւերացուց ուսանողի տոլարին յատուկ օրինագիծը, ինչպէս նաեւ քաղաքապետական եւ թաղապետական ընտրութիւնները յետաձգեց 31 մայիս 2023-ին:
Խորհրդարանը քննարկեց նաեւ շինարարական կարգ մը արտօնագիրները տուրքերէ զերծ պահելու օրինագիծը, որուն մասին մեծ թիւով երեսփոխաններ իրենց մերժումը յայտնեցին, սակայն այդ օրինագիծը վաւերացուեցաւ քուէարկութեան հետեւեալ պատկերով. 44` թեր, 33` դէմ եւ 2` ձեռնպահ:
Խորհրդարանը վաւերացուց Պէյրութի նաւահանգիստի պայթումէն վնասուած շրջաններու պահպանումին եւ վերակառուցման յատուկ օրինագիծ մը, լիբանանեան դեղորայքի արտադրութեան օժանդակելու օրինագիծը, ինչպէս նաեւ Թլէյլի պայթումին զոհերը լիբանանեան բանակի նահատակներուն համազօր նկատելու օրինագիծը:
Յետմիջօրէի ժամը 12:50-ին Պըրրի յայտարարեց նիստին աւարտը` օրինաթիւի չգոյութեան պատճառով:
Վարչապետ Միքաթի նիստէն ետք յայտնեց, որ կառավարութիւնը պիտի չհրաժարի, որպէսզի երեսփոխանական ընտրութիւնները յետաձգելու պատճառաբանութեան մը առիթ տուած չըլլայ:
«Երեսփոխանական ընտրութիւնները ջնջելու պատճառ չեմ կրնար ըլլալ, եւ այդ պատճառով ալ պիտի չհրաժարիմ», ըսաւ ան:
Ան նկատել տուաւ, որ ինք նախանցեալ օր լսած է յայտարարութիւններ, որոնք կը վերաբերին կառավարութեան վստահութեան քուէին, եւ այդ պատճառով ալ Պըրրիին ներկայացուցած է այդ պահանջը:
Վարչապետը ընդգծեց, որ իրենց քարտերը բաց են, եւ իրենք պատրաստ են ամէն ինչ թափանցիկութեամբ ներկայացնելու: «Երկրին տագնապները ամբոխահաճոյ կերպով կարելի չէ լուծել, որովհետեւ հայրենիքը սուղ կը վճարէ անոր գինը, իսկ կացութիւնը կը դառնայ ապառողջ: Եթէ միասնաբար չաշխատինք, անկարելի է, որ լուծումներու յանգինք», ըսաւ ան: