ԵՐԵՒԱՆ, «Ազատութիւն».- Ատրպէյճան յստակացուց Հայաստանի հետ սահմաններու սահմանազատման եւ սահմանագծման ազգային յանձնաժողովի, ինչպէս նաեւ խաղաղութեան պայմանագիրի նախապատրաստման պատուիրակութեան կազմերը: Այս մասին յայտարարեց Ատրպէյճանի վարչապետ Ալի Ասատով՝ ԱՊՀի երկիրներու կառավարութիւններու ղեկավարներու հեռավար նիստին` առանց մանրամասնութիւններ տալու:
Ան իր խօսքին մէջ յայտարարեց, որ, հակառակ եռակողմ աշխատանքային խումբերու ծիրին մէջ հանդիպումներուն, տարածաշրջանի տնտեսական եւ ուղիներու հաղորդակցութեան կապերու վերականգնման ուղղութեամբ յառաջընթաց չի նկատուիր:
Ասատով նաեւ պնդեց, որ 9 Նոյեմբեր 2020-ի եռակողմ պայմանաւորուածութիւններու 4րդ կէտը, որ կը նախատեսէ «Ատրպէյճանի տարածքէն հայկական զինուած ուժերերու դուրսբերումը, առայժմ կը մնայ անկատար»: